Articulus 4A

Argumentum 1

Ad quartum sic proceditur. Videtur quod activa vita sit nobilior quam contemplativa. Tullius enim, in Lib. De offic., probat praeeminentiam justitiae ad alias virtutes; quia propter exercitium actus ejus, actus aliarum interimuntur.

Sed similiter aliquis revocatur ab otio contemplationis, ut fructum faciat per laborem actionis. Ergo activa vita est dignior quam contemplativa.

Argumentum 2

Praeterea, bonum gentis divinius est quam bonum unius. Sed vita contemplativa consistit in bono unius hominis, vita activa in bono multorum.

Ergo vita activa est nobilior quam contemplativa.

Argumentum 3

Praeterea, in omnibus artibus et potentiis imperans est nobilius imperato. Sed politica quae ad vitam activam pertinet, imperat omnibus disciplinis, et disponit de his quae ad contemplativam vitam pertinent, secundum philosophum in 1 ethic..

Ergo vita activa est dignior quam contemplativa.

Argumentum 4

Praeterea, secundum dionysium, nihil est divinius quam dei cooperatorem fieri. Hoc autem fit per exercitium activae, qua homo aliorum reductioni in deo studet. Ergo videtur esse nobilissimum.

Sed Contra 1

Sed contra est quod dicit dominus, Luc. 10, 43: maria optimam partem elegit. Per mariam autem vita contemplativa significatur. Ergo vita contemplativa nobilior est quam activa.

Sed Contra 2

Praeterea, quanto vita alicujus est caelesti vitae similior, tanto est nobilior. Sed vita contemplativa est similior caelesti quam activa: quia in caelesti vita, ut dicit Augustinus, vacabimus et videbimus; videbimus et amabimus; amabimus et laudabimus: quod ad vitam contemplativam pertinet. Ergo vita contemplativa est nobilior quam activa.