Acta Apostolicae Sedis - Commentarium Officiale952

Civitatibus Foederatis Americae Septentrionalis, in Ora Diviti, in Insulis

Oceani Indici, in Monte Leonino, in Italia, Hispania, Hibernia et Nigeria;

post mortem eius, vero, missiones etiam in Corea, India, Russia et Argentina

consurgent. Novissima Matris Mariae Agnetis-Teresiae actuositatis missio-

nariae testimonia insecutae sunt fundationes missionariorum laicorum

Praecursorum Sanctae Clarae et Instituti religiosi Missionariorum Christi

pro Universa Ecclesia.

Iter eius sanctificationis, quam in constanti exquisitione unionis cum

Christo atque in perenni de animarum salute sollicitudine vixit, consuetae

cuidam laetitiae, benignitati, aequitati spirituali et consuetudini orationis

conseruit. Fides, spes et caritas eam omnibus in adiunctis rexerunt eique

siverunt, ut haud paucas superaret difficultates et acerrimas quasdam

angustias, quas Congregatio eius passa est.

Cor eius, Dei et Virginis Guadalupensis amantissimum, profunda etiam

doctrina spirituali, quam in scriptis suis testata est, exundavit atque ad

ipsum mundum in Christum pertrahendum, ut qui sane universorum esset

moderator, summopere consecravit. «Missionaria inexhausta et absque fini-

bus » fuit, uberis ingenii missionarii vas, quod Deus ei dedit ad patrandum

opus commissum et ipsa eucharistico spiritu, sacerdotali et mariali, fulsit.

Spiritualitas eius non modo uti fecunditas missionariae Familiae exstat, sed

tamquam patrimonium ipsius Ecclesiae Universalis.

Missionem autem suam Mater Maria Agnes-Teresia in mundo expletura

erat: anno 1980 enim, cum magni laboris munera subire decrevisset, ultimum

moliens iter omnes visitavit domus per quinque terras orbis diffusas. Cum

Romam remeavit mense Octobris, iam graviter aegrota erat. Valetudo Matris

Mariae Agnetis-Teresiae valde in peius ruit, praesertim post Nativitatem

Domini anni 1980 asperrimos sustinens dolores usque ad diem 22 mensis Iulii

anno 1981, quo misericorditer in Domino quievit.

Ob sanctitatis famam, a die 31 mensis Octobris anno 1992 ad diem 15

mensis Octobris anno 1996 apud Curiam Cuernavacensem et a die 25 mensis

Martii anno 1994 usque ad diem 26 mensis Iunii anno 1996 apud Vicariatum

Urbis Inquisitio dioecesana celebrata est, cuius auctoritas et vis iuridica a

Congregatione de Causis Sanctorum Decreto diei 25 mensis Octobri anno

1997 probatae sunt. Positione confecta, iuxta suetum morem, die 16 mensis

Ianuarii anno 2008, in Congressu Peculiari Consultorum Theologorum

prospero cum exitu disceptatum est an Serva Dei more heroum virtutes

christianas exercuisset. Patres Cardinales et Episcopi in Sessione Ordinaria