2. De Omnibus Sanctis.

1. O pater ingenite,

Omnium creator,
Atque unigenite,

Vitae reparator,
Sancteque paraclite,

Mitis consolator,
Deus unus credite,

Noster sis tutator.

2. O Iesu castissima

Genetrix, Maria,
Virgo prudentissima,

Clemens, dulcis, pia,
Fac, Christi carissima,

Nos finita via
Caeli suavissima

Frui melodia.

3. O vos archangelici

Spiritus beati
Simulque angelici

Chori Deo grati,
Estote causidici

Nostri, ut purgati
Valeamus adici

Summae claritati.

4. O vos venerabiles

Dei praeelecti,
Patriarchae nobiles,

Viri circumspecti,
Deo nos odibiles,

Vitiis infecti,
Fiamus amabiles

Per vos et dilecti.

5. O prophetae, flamine

Divino repleti,
Praefantes de virgine

Nascituram laeti
Christum, cuius nomine

Hostes sunt deleti,
Vestro nos precamine

Iungite quieti.

6. O Baptista, clarius

Pollens vi amoris,
Qui fuisti praevius

Christi salvatoris,
Nobis hic inferius

In valle maeroris
Fac ut sit propitius

Deus cunctis horis.

7. O Petre apostolice,

Princeps ceterorum,
O Paule benevole,

Doctor populorum,
O veri christicolae,

Socii eorum,
Per vos simus accolae

In regno caelorum.

8. O vos evangelii

Sacrati scriptores,
Doctores egregii,

Fidei cultores,
In die iudicii

Nostri defensores
Sitis, ne nos impii

Crucient tortores.

9. O sacra collegia,

Pulchra, rubicunda
Martyrum, qui omnia

Spernentes immunda
Tradidistis propria

Poenis membra munda,
Nos ad caeli gaudia

Ducite iucunda.

10. O devoti famuli,

Sobrii, pudici
Confessores, saeculi

Huius inimici,
Vestri nunquam servuli

Stygis dentur pici,
Sed vestro consortio

Iungamur felici.

11. O puellae languidae

Christi caritate,
Castitate candidae,

Angelis aequatae,
Virgines praefulgidae

Vitae sanctitate,
Vivere intrepide

Nobis impetrate.

12. O Deus, qui praemium,

Virtus, laus et honos
Es sanctorum omnium

Te per dulces sonos
Semper collaudantium,

Nos effectos bonos
Trahe post exsilium

Ad caelestes thronos.