213. Dictamen de Presbyteris.

1. Multi sunt presbyteri,

qui ignorant, quare
Super domum Domini

gallus solet stare;
Quod propono breviter

vobis propalare,
Si vultis benevolas

aures mihi dare.

2. Gallus est mirabilis

Dei creatura
Et recte presbyteri

illius figura,
Qui praeest ecclesiae

animarum cura,
Stans pro suis subditis

contra nocitura.

3. Supra crucem positus

gallus contra ventum
Caput diligentius

erigit extentum,
Sic plebanus, ubi scit

praedonis adventum,
Illi se obiciat

pro grege bidentum.

4. Videmus, quod piger est

gallus aliquando
Sive levis nimium

contra ventum stando,
Sic multi presbyteri

quasi dormitando
Locum dant diabolo,

praedoni nefando.

5. Gallus regit plurimam

turbam gallinarum
Et sollicitudinem

magnam habet harum,
Sic plebanus capiens

curam animarum
Doceat et faciat,

quod sit Deo carum.

C. Gallus granum colligens

convocat uxores
Et illud distribuit

ante cariores,
Tales discat presbyter

pietatis mores
Dando suis subditis

scripturarum flores.

7. Gallus tempus praecinens

horae nocturnalis
Primitus a propriis

se castigat alis,
Castigando primum se

pastor fiat talis,
Tunc dicendo subvenit

subditorum malis.

8. Quasi rex in capite

gallus coronatur,
In pede calcaribus

ut miles armatur,
Quanto plus fit senior,

pennis deauratur,
In nocte dum concinit,

leo conturbatur.

9. Sic pastor, qui bene scit

populo praeesse,
Pigros cum calcaribus

monet indefesse,
Confortando debiles

verbi Dei messe,
Post laborem aureus

ut rex debet esse.

10. Solet leo tremere
de galli canore,
Et fugit diabolus,
solito de more

Gallus cum cantaverit,
sed magis ab ore

Albi galli ; reor hoc
in figura fore.

11. Castitas albedine

solet figurari,
Et plebani maxime

solent honorari
Illi, qui luxuria

nolunt inquinari,
Ab hic credo citius

daemones fugari.

12. Gallus suas feminas

solet verberare,
Has, quas cum extraneo

novit ambulare,
Sic sacerdos subditos

debet castigare,
Contra legem Domini

qui solent peccare.

13. Basiliscus nascitur

ovis de gallorum,
Sic crescit diabolus

ex presbyterorum
Magna neglegentia,

qui de subditorum
Non curant sceleribus

nec de spe caelorum.

14. Pullos solet ducere

gallus mutilatus,
Et a mulieribus

per hoc fit amatus,
Sic pro caeli gloria

presbyter castratus
Deo et hominibus

per hoc erit gratus.

15. Gallus nunquam negligit

tempus vespertinum,
Tunc cum suis subditis

volat ad supinum,
Ut in nocte media

tempus matutinum
Servis Dei praecinat

ad opus divinum.

16. Sic et bonus presbyter

respuens terrena
Ducat suos subditos

ex inferni poena
Praebens iter caelicum

cueli per amoena,
Cum Christus advenerit,

turba sit serena.

17. Haec nobis sufficiant

de gallo notata
Et in audientium

corda sint locata
Tenaci memoria,

quasi nux museata
Plus reddit aromata

bene masticata.

18. Imitator galli sis,

sapiens plebane,
Vivendo sollicite,

consurgendo mane,
Lege, stude, praedica,

horas tuas cane
Et sic in caelestibus

corde, mente mane.