78. De sancto Corbiniano.

1. Nobilis Corbiniane,

Tu doctrinae sator sanae,

Gratiarum scrinium,
Dei fortis agonista,
Ut Christi Iesu baptista
Dirimens affinium

2. Nuptias illecebrosas,
Deo sanctisque exosas,

Letalem invidiam
Meretricis incurristi,
Sed te pia manus Christi
Vitare perfidiam

3. Dedit huius meretricis,
De cuius excurrens vicis

Strenue evaseras
Ut Elias Iezabelem
Idolatram infidelem.

Gregem Dei paveras,

4. Oleum ministrans vitae,
Vinum, quod de vera vite

Profluit adiciens,
Sanos sane praeservando,
Mire saucios sanando

Singulis proficiens.

5. Catervatim ad te multi
Noxis grandibus sepulti

Concito consiliunt,
Pasti pabulo doctrinae
Praestitae tibi divinae

Ad sua prosiliunt.

6. Nam eras verbo facundus,
Affectu nulli secundus

Pio et oboediens,
Papam enim bis adisti,
Non obtento, quod petisti,

Ad ovile rediens.

7. Ubi tibi commendatis
Monimenta veritatis,

Cultor castimoniae,
Ut decebat, proponebas,
Inter quos parce degebas,
Actor parsimoniae.

8. Doles panem filiorum
Partum fluxibus sudorum

Brutis dari canibus,
Loco cedens sed redisti,
Mitis reos arguisti

Verbis non inanibus.

9. En, praesagium divinum,
Quasi cor haberes b i n u m,

Tuo dedit nomini,
Non fictae duplicitatis,
Binae vero caritatis

Proximi et Domini.

10. Cum pravatis bellum gerens,
Sed exsultans, si quis maerens

Reus ad te fugerat,
Adamator paupertatis,
Exsufflator vanitatis,

Curae tibi fuerat,

11. Fugere fallacem mundum,
Contra Deum furibundum

In sui perniciem,
Qui non parcit sanctitati
Nec sexui nec aetati

Nec colit canitiem,

12. Qui implumes, heu, deplumat
Atque rabiem despumat

Opprimendo debiles,
Cuius gaudiosos cantus
Aeterni sequuntur planctus,

Atroces et flebiles.

13. Sed prudentia superna
Praevidebat, ut lucerna

Exstares in patulo,
In supremo praesulatus
Gregem eius sublimatus

Regeres cum baculo.

14. Pravos stimulo pungendo,
Unco bonos attrahendo,

Quod est pii praesidis,
Quod ubertim perfecisti
Ut fidelis servus Christi

Poenam vitans desidis.

15. Voce cordis nec non oris
Deum oras paucis horis,

Aquam vinum faciens
Te cunctipotens audivit,
Fons e terra scaturivit

Plurimis sufficiens.

16. Bonum in terris sevisti,
Quod in caelis messuisti

Fructibus uberrimis,
Praescivisti vitae metam,
Intras Dei aulam laetam,

Ubi nunc pulcherrimis

17. Vernis floribus ornaris
Et cum paribus laetaris

In aeterna gloria,
Praemunitus sacramentis
Tuae carnis atque mentis

Omni lota scoria.

18. Eia, pater et patrone,
Nos satanico mucrone

Confixi crudeliter
Gemebundi clamitamus,
Impetra hoc, quod speramus
Orantes fideliter.

19. Dei gratiam adepti,
Poenis trucibus erepti

Infernalis furiae
In conspectu deitatis
Praesentemur cum beatis

Caeli toti curiae.

20. Ubi caelorum reginam
Et essentiam divinam

Mirantes videbimus
Et his, qui pro culpis gemunt,
Quos hic mundi mala premunt,

Laeti corridebimus,

21. Grates Deo referentes
Propter gratias ingentes

Factas magnanimiter;
Det hoc nobis almum flamen,
Corde toto dicant Amen

Omnes unanimiter.