267. Planctus pro diuturna captivitate terrae transmarinae per Saladinum.

1 a. Miror, cur tepeat,
Cum debeat

Lex planctus crescere,
Querorque lacrimas
Iustissimas

Vix ulli fluere;
Sit par causae fel dolorum,
Nam grex Babel, faex errorum,

Nodis angustiae
Sion, heu, nexuit,
Dum atrox irruit

In solum gratiae.

1b. Gemat ecclesia,
Quod gloria

Terrarum omnium
Diu polluitur
Et premitur

Iugo gentilium ;
Erubescant nostri duces,
Quod non sumunt cursim cruces

Pro Iesu nomine,
Cum Ierosolyma
Sit confusissima

Turcarum turbine.

2 a. Ha, tempus asperum
Cladis tam stabilis,
Tamen cessabilis

Bonorum operum
Remedio ;
Ferveat compunctio,

Pluat luctus fortiter,

Sint preces humiliter,
Donec vulgus impium
A locis fidelium

Summus pellat arbiter.

2 b. Urbs quondam inclita
Multis insignibus,
Nostris urgentibus

Peccatis perdita,
Diripitur,
In praedam redigitur,

Sepulcrum dominicum

Per manus carnificum ;
Quid tantae miseriae
Nuntiant historiae

Vetustorum apicum?

3 a. O si threnis eiulans

Ieremias viveret!

Spinas cordis panderet
Vox lamenta baiulans,

Quam flens vates promeret;
Hic si usquam propter Deum
Sciret novum Macchabaeum,
Contra diros ob tropaeum

Ensem rursus tenderet.

3 b. Nomen habet sine re
Capta pacis visio,
Tot annorum spatio
Cernitur pestiferae;

Catervae possessio ;
Tractant arcam Philistaei,
Muros tenent Cananaei,
Consonant Madianei
Loth utrique filio.

4 a. Sed iam Christi potentia

Vim paganorum conterat,
Iam Cyrus noster conferat
Regressum christianis;
Veri David clementia,
Ouae mansuete tolerat,
Iam salvat a profanis
Ablata sanctuaria.

4 b. Revertamur ad Dominum
In sacris et cineribus,
Ut trusis procul hostibus
Tellus alma purgetur
Et dono patris luminum
Sacris dicata cultibus
Devota conservetur
Usque ad caeli terminum.