233. Lessus Paenitentis.

1. Vitae dator et plasmator
Ac redemptor hominis,
Clavis David, quem portavit
Venter almae virginis.

2. Benedicte rex, dimitte
Mihi cuncta debita,
Quae contraxi, nam haec auxi
Semper agens vetita.

3. Hen, quam male spiritale
Bibendo mysterium
Violavi, nam foedavi
Me per omne vitium.

4. Male feci, quod subieci
Pravis me spiritibus
Serviendo et favendo
Sceleratis actibus.

5. Fili Dei, cordis mei
Dissipa caliginem,
Ne descendam in horrendam
Inferni voraginem.

6. Interventu et obtentu
Matris tuae virginis
Me timore et amore
Tui reple nominis.

7. Pius esto, memor esto,
Quid pro nobis feceris,
Pro indignis et malignis
Quanta sustinueris.

8. Preces audi et custodi
Nos a cunctis hostibus,
Exoratus et placatus
Matris tuae precibus.

9. Intercedat haec et reddat
Nobis te placabilem,
Quae portavit atque pavit
Lacte factum humilem.

10. Propter eam, quaeso, meam
Munda conscientiam,
Ne offendam reverendam
Tuitus tui gloriam.

11. O beate, pietate

Tua me iustifica,
Quid agendum, quid dicendum,
Mihi semper indica.

12. Deos homo, fac de domo
Nos exire carceris
Et iam dones mansiones,
Quibus ipse cerneris.

13. Tuum vultum inoccultum
Tuis iam fidelibus
Manifesta atque praesta
Pacem te colentibus.

14. Fac intrare nos praeclarae
Tuae domus atria
Atque bonis mansionis
Nos supernae satia.

15. Tibi nato cum beato
Patre laus et gloria
Flaminique, qui utrique
Compar est per omnia.