144. De sancta Katharina.

1. Katharina, o regina,

Virgo, martyr diceris,
Alexandrinalis civis

Tu regalis crederis,
Sponsa Christi principalis
Digne veneraberis.

2. Ab avis et atavis

Alta stirpe genitis,

Regali, imperiali
Dignitate praeditis,

Rege Costo, Sabinella,
Orta ab ingenuis.

3. Tu es filia novella,
Cella eloquentiae,

Simplex, clara columbella,
Stella excelleutiae,

Ornans stipem tu agnella,
Fiscella clementiae.

4. Haec puella septenalis

Optimi ingenii
Omnis artis sericalis

Gradu magisterii
Fit perfecta curialis

Ens et magni animi.

5. Est in aula paternali
Docta liberalibus
Cum honore virginali

Cunctis mundi artibus,
Arte summa magistrali
Sublimata caelitus.

6. Repertus non est orator
Huic comparabilis,

Aut omnis doctrinae lator
Ei coaequabilis,

Victus cedit disputator,
Stat insuperabilis.

7. Intenta sic studiosis

Fixum tenens animum,

Occupatum virtuosis,

Mundum spernit lubricum,

Fructuose tempus suum
Expendit ad studium.

8. Nuptui tandem habilis
Regni a baronibus

Pulsaris, matre rogaris,
Intendas sponsalibus,

Ne regnum pateat patris
Gladiis hostilibus.

9. Ab his semel, bis rogata,
Ter quatterque, pluries,

Multorum regum oblata
Tunc magna congeries,

A te indigna putata,
Spreta, ne acciperes.

10. Respaensque fidem Christi
Tumens tunc scientia
Baptizari noluisti,

Luctans eloquentia,

Matris verba neglexisti

Tunc expedientia.

11. Eras tamen nocte una

Cum matre tu dormiens,
Admirandam visionem
Utraque conspiciens,
Nam beata virgo mater
Multos sanctos offerens.

12. Gratiosum inter omnes
Monet, ut eligeres,
Omnes a te refutati

Sunt tamquam degeneres,
Es a matre increpata,
Cur ita desiperes?

13. Iesum Christum, suum natum,
Virgo mater obtulit,
Sponsum verum destinatum

Ipsum tibi protulit,
Sed hunc prorsus praesentatum
Tua mens non respuit.

14. Nam allecta ex inspecta
Eius pulchritudine,

Vita, moribus, virtute,
Forma, fortitudine,

Scientia ac aetate,
Status magnitudine.

15. Ad habendum corde toto
Hunc et nullum alium,
Eum cernis celsiorem
In natis mortalium,
Matri suadens omni voto,
Eius quaerat animum.

16. Generosam Christi matrem

Tua mater adiit,
Natus eius desponsetur

Suae natae, petiit,
Christus eam, baptizari

Nisi vellet, respuit.

17. Ergo fide christiana
Imbui desiderat
Et a quodam eremita
Plene docta fuerat,
Tunc et sacro fonte lota
Christo sic placuerat.

18. Novo annulo arrhata
Amore tunc arserat
Et mundanam omnem artem

Pleno postposuerat,
Sese ad scripturam sacram
Animo transtulerat.

19. Egenis res temporales

Erogare coeperat
Et in regno sui patris

Vice-domnum linquerat,
Urbem ad Alexandrinam

Cum matre perrexerat.

20. Regni matris pars haec erat
Et quieti congrua,
Sed in brevi est defuncta

Eius mater credula,
Hinc clientum turbam magnam
Rexit Dei famula.

21. Omnia honesta, recta

Coepit tunc disponere,

Virtuosis, fructuosis
Ferventer insistere,

Nec sacrarum scripturarum
Studium relinquere.

22. Sed cum die quadam rite
Audisset per nuntium,

Quod in templo idolorum
Grande sacrificium

Per pessimum idolatram
Fieret Maxentium,

23. Accensa fervore zeli
Ad tyrannum abiit,
Inter brutorum caesorum

Strages illum adiit,
Absque Ave con decenti
Vehementer arguit.

24. Virgo ait: Tibi Salve
Congruenter fieret,

Si honestas tui status
Perfecte cognosceret,

Ut vel spreta creatura
Creatorem coleret.

25. Ipse solus Deus verus,
Cui honor, gloria,
Fide, spe et caritate
Habitat in anima,
Dii sunt autem idolorum
Pessima daemonia,

26. Regem regum inhonorant
Summam per superbiam,

Homines sic inducentes
Dei ad iniuriam,

Ut deceptos et abiectos
Trahant ad miseriam.

27. Grenerosam imperator
Puellam respiciens

Gratiosa eius verba
Audivit impatiens

Et e contra replicavit
Multa ut insipiens,

28. Omni dolo hic versutus
Plenus fraude simulat,

Ad regalem secum aulam
Ire hanc insinuat

Donis magnis munerandam,
Si deos non respuat.

29. Manet autem virgo sacra
Arta sub custodia,

Donec ab extremis terrae
Viri magna copia,

Idolorum defensores
Magna zelotypia

30. Advenirent sapientes,

Famosi scientia,
Gloriantes ut pomposi

Omni eloquentia,
Universosque spernentes

Stulta extollentia.

31. Reducta est ad conflictum
Docta Christi famula,

Confitetur verum Deum
Christum voce sedula,

Obmutescunt quinquaginta,
Fiunt corda tremula.

32. Tandem credunt et affirmant
Christum Dei filium,
Deos falsos detestantur

Nec timent supplicium;
Indignatur et minatur
His hostis incendium.

33. Ignis ergo copiosus

Praeparatur ocius,
In quem draco furiosus

Hos mittit velocius,
Sic cremati, coronati

Regnant gloriosius.

34. Repromittit post haec Caesar

Virgini magnalia,
Post reginam ut sit ipsa

Secunda, non alia,
Totum regnum gubernare,

Haec et multa talia.

35. Sponsa Christi universa
Contempsit ut vacua

Nec curavit de honore,
Nec de vana statua,

Sed derisit promittentem
Atque verba fatua.

36. Porro spretus imperator
Coepit in hanc furere

Ac ministris statim iubet
Vestibus exuere,

Lacerare corpus eius
Scorpionum verbere.

37. Omnia tormenta minans
Clausit in ergastulo,
Ter quaternis hanc diebus

Absque cibo, poculo
Cruciandam, macerandam,
Abit ipse clanculo.

38. Non remansit locus iste
Absque claro lumine

Neque carens angelorum
Dulci consolamine,

Sed refecta caeli cibo
Est et medicamine.

39. Sed et a regina visa
Est et a Porpbyrio,

Quibus multa de futuro
Praedixit martyrio,

Quos instructos Christi fide
Dimisit cum gaudio.

40. Ab extremis regionis

Caesar tunc revertitur

Ac pro tribunali sedens,
Virgo nunc adducitur;

Pulchriorem ipsam cernens,
Valde hinc concutitur.

41. Christi testem tunc inquirit,
Quid deliberaverit,

Unum certe e duobus
Dicat, quod elegerit,

Tura si non obtulerit,
Sciat, quod perierit.

42. Respondens tyranno virgo

Voce ait libera:
Neque verba blanda curo

Nec tormenta aspera,
Mori nunc amore Christi

Res est mihi prospera.

43. Ipse leo frendens ore

Extra se tunc rapitur,
Atque horrenda rotarum

Machina construitur,
Ut per eam discerpatur,
Christi martyr ducitur.

44. Statim autem sic adducta
Erectis luminibus
Deum orat, destruatur
Supernis fulminibus,
Nullam tamen laesionem
Agat in hominibus.

45. Tunc virtute vehementi
Machina dissolvitur

Et confracta super gentes
Impetu dispergitur,

Turba quadriges millena
Hominum occiditur.

46. Ista videns imperatrix
Prosilit in medium

Reprobando sui viri
Impium iudicium,

Cernens hanc fidelem factam,
Damnat ad supplicium.

47. Gladio percussa ergo

Migravit ad Dominum,

Tumulata cum honore
Fuit per Porphyrium,

De quo facto diffamatus
Se dat ad martyrium.

48. Laetus hic electus miles,

Prudens, dives, strenuus,
Inter milites ducentos

Primus et praecipuus,
Coram rege profitetur,
Quod sit Christi famulus.

49. Omnes tunc commilitones
Ad fidem converterat,
Quibus et aeterna regna

Consequi promiserat,
Hos hinc omnes Caesar simul
Grladiari iusserat.

50. Rursus infernalis leo
Virginem interrogat,

Haec constanter ante dictam
Vocem veram iterat,

In eam tunc mortis legem
Imperator fulminat.

51. Ista sic damnata morti
Extra urbem ducitur,

Turba magna mulierum
Ei tunc compatitur,

Haec earum vanos fletus
Prohibere nititur.

52. Orandi tunc petit dari
Virgo sibi spatium
Oculisque elevatis

Orat patrem luminum,
Gratias devote agens

Clamat sic ad Dominum:

53. Salus, honor, gloria sit
Tibi, o altissime,
Quod me ad agonis finem

Ducis dignatisssime,

Corpus tibi spiritumque

Reddo fidentissime.

54. Ad choreas virginales,

Da, ut iam perveniam,
Mala, rosas triumphales

Tibi, Christe, colligam,
Aspectus tuos solares
Nunc et semper videam.

55. Oro, Deus, corde toto
Pro me diligentibus,

Passionem pleno voto
Meam recolentibus

Atque spiritu devoto
Mihi congaudentibus,

56. Rogo, Christe Iesu bone,
Pro tua clementia,

Quisquis suo in agone
Sua indigentia

Mea orat passione,
Defer indulgentiam.

57. A fame, infirmitate,
Ab omni molestia,
A clade, necessitate,
Ab omni angustia
Liber sit et sanctitate
Conscendat caelestia.

58. Dum haecverba Christi martyr
Pia mente dixerat,

De sublimi nube caeli
Vox ad eam venerat:

Veni nunc, electa mea,
Te caelum desiderat;

59. Omnes sancti, sponsa mea,
Chorusque virgineus

Te exspectant in chorea
Cantantes serenius,

Rubra stola ac nivea
Ornent te amoenius.

60. Mentibus illi cernuis
Qui te invocaverint,

Passionem quoque tuam
Hic qui celebraverint,

Sciant, quod optata vota
Per te reportaverint.

61. In hac voce consolata

Virgo martyr plurimum,

Collum lacteum sub spata
Tendens orat Dominum ;

Sic regina decollata
Consummat martyrium.

62. Nam statim de gleba sacra
Lac fluxit pro sanguine,
Sicca terra sic rigata

Fit fecunda germine,
Fructum ferens non arata
Multa plenitudine.

63. Virtus adest supernalis
Magna multitudine,

Caput, massa virginalis
Transfertur cum lumine,

Pape, montis caelicalis
Sepelitur culmine.

64. Monumentum virgineum

Angelorum opere
Factum exstat marmoreum,

Et de sancto corpore
Morbi sanat aculeum

Fluens sacrum oleum.

65. Porro sacro hoc unguento

Fiunt laudabilia.
Membra hoc medicamento

Sanantur debilia,
Fidei ex fundamento

Fiunt mirabilia.

66. Rursus passa est beata
Anno tricentesimo

Sexto Christum imitata
Menseque Novembrio,

Cum quo regnat elevata
In sublimi solio.

67. Omnem artem doctrinalem
Virgo ista obtinet,
Vitam sapientialem

Haec in summo continet
Gloriamque clericalem
Nunc in caelo possidet.

68. Nam haec virgo gratiosa

Multa privilegia

In se tenet speciosa,

Sanctis singularia.

Ipsi tamen gloriosa

Sunt et generalia.

69. O beata Katharina,
Dei patris natula,

O amabilis regina,
Nati Dei sponsula,

O columba amantina,
Spiritus tu cellula.

70. Bene Christus te dotavit,
Qui fructu centesimo

Te bis terque exaltavit,
Throno praeclarissimo

Coronatam sublimavit
Statu beatissimo.

71. In hoc facto fine tracto,
Virgo amantissima,

Dei ad laudem peracto
Peto te, sanctissima,

Vase luteo confracto
Duc me ad laetissima.

72. Sit beatae Trinitati

Decus, salus, gloria.

Simplae sit et unitati
Honor, hymnus, latria,

Sit aeternae Deitati
Amor, laus in patria.