160. De sancta Maria Magdalena.

1. Maria, spes veniae,
pia Magdalena,
Quae cum Iesu possides
caelorum amoena,

Servum tuum respice

facie serena,
Ne post mortem crucier

gehennali poena.

2. Ad fontem clementiae

aestuans venisti
Pedesque dominicos

lacrimis lavisti,
Cum devotis osculis

capillis tersisti,
Sicque indulgentiam

culpae meruisti.

3. Regi nunc piissimo

reconciliata,
Per multas es lacrimas

ipsi facta grata,
Fac, ut sordes abluam

cunctaque errata,
Ne me Styx tartareus

glutiat post fata.

4. Invenisti gratiam

apud redemptorem,
Qui tuum gratissime

curavit languorem,
Me foedum concilia

sibi peccatorem
Tuumque, piissima,

fove servitorem.

5. Angelorum dominus

te iustificavit,
Cum te a reatibus

gratiose lavit,
Meque scelus multiplex,

proh dolor, prostravit,
Per te Iesus erigat

cum beato David.

6. Memor sis, quod fueris

famosa peccatrix,
Nunc vero peccantium

clemens mediatrix,
Mihi sis propitia,

dulcis miseratrix,
Meae quoque animae

iugis consolatrix.

7. Acta tua pristina
nunc rememorando
Ipsa, mater, replico
non improperando,

Sed Dei clementiam
inde collaudando,

Quam benignam mihi fac
pro me supplicando.

8. Gratia per saecula

te fecit famosam
Nec non peccatoribus

cunctis gratiosam,
Plantans in caelestibus

te clementem rosam,
Me audire dignum fac

tecum caeli prosam.

9. Deus tuis fletibus

per potentem manum
Suscitavit Lazarum

iam perfecte sanum,
Fac me, pia, vincere

hostem veteranum,
Qui, heu, multipliciter

cor seduxit vanum.

10. Ad te, benignissima,

recurro peccator,
Intercede supplicans

pro me, ut salvator
Mea purget scelera,

suus ut amator
Iugiter permaneam

tuusque laudator.

11. Lacrimarum gemitum

Mihi impetrare
Digneris, mitissima,

ut nunc deplorare
Mea possim crimina

teque sic amare,
Ut dignetur Iesus me

tecum coronare.

12. Eia, beatissima,

miserere mei,
Mea fer suspiria

ante thronum Dei,
Fac, ut iungi merear

eius faciei
Tuaeque consocier

sanctae requiei.

13. Nunc ergo, sanctissima,

pensa, quid fuisti,
Quam Dei clementia

tunc indiguisti,
Tu misericordiam

nobis placa Christi,
Sicut eam fieri

tibi voluisti.

14. Amen dico rogans te

Iesu dilectricem,
Meam, quaeso, animam

praevaricatricem
Tuis fac precatibus

hostium victricem
Et aeternis sedibus

tecum assistricem.