25. De sancta Agnete.

1. O si possem et si nossem,

Mira libens promerem,
Ad honorem et decorem

Resultando psallerem
Gloriosae, pretiosae

Agnetis Christi virginis,
Cuius festa, cuius gesta

Mirae sunt dulcedinis.

2. O miranda et laudanda

Summi regis filia,
Rubens rosa, speciosa,

Cuius odor lilia
Vincit nimis, me ab imis

Relevari penitus,
Irrigari et firmari

Fac cor meum caelitus.

3. O Romana mis patrona,

Stirpe nata nobili,
Felix Agnes, fortis magnes,

Assis mihi labili ;
Pauper ego te non nego,

Mihi fac dulcissimam
Sciens vere te habere

Mentem benignissimam.

4. Quam amoena, quam serena

Sion haec iuvencula,
Quam amavit et ornavit

Manens rex per saecula;
Mi dilecta et collecta

Tu de spinis rosula,
Carens felle, plus quam melle

Dulcior puellula.

5. Servum tuum, qui cor suum

Tibi dedit, respice,
Diligenter et libenter

De me, sancta, prospice;
O quis sciet, quantum fiet

De te mihi gaudium,
Transiturus et iturus

Quando sum ad bravium,

6. Tuus ero, non despero,

Scio, quod non despicies
Me indignum, hoc in signum
Caritatis facies,

Vultu rubens, sponso nubens,

Agno Dei filio,
Rubicundo qui iucundo

Locans te in solio.

7. Imperare et regnare

Fecit te quam prospere,
Adiurare me dignare,

Mater mea, propere,
Dives donis, me de bonis

Imple fundens nocua,
Si accedis, non recedis

A dilecto vacua.

8. Quem vidisti, quem quaesisti

Tuo tincta sanguine,
O felicem te victricem,

Quo extollam carmine?
Quae unxisti et traxisti

Meum cor radicitus,
Ut erectum et directum

Amet te medullitus.
9. O quam suavis et non gravis

Amor hic illabitur,
Libens vero Iactus ero,

Tecum si morabitur
Placens Deo, cordi meo

Tu amoris oculus,
Dulcis tota, lacte lota

Paradisi flosculus.
10. Geris sertum tu confertum

Flore decentissime
Et post matrem summum
patrem

Sequeris laetissime,
O mi dea, in te mea

Anima laudabitur,
Semper tibi hic et ibi

Cor meum parabitur.
11. Dulcis plane mentis sanae

Tui recordatio,
Valde pia tu es quia,

Mea gloriatio,
Quam iucunda, quam profunda

Tua laus et gloria,
Et haec digne, quae in igne

Aurum fis de scoria.

12. Vas insigne, quod condigne

Vili de materia
Deus fecit et perfecit

Laude multifaria,
Violeti et roseti

Locus es et plantula,
Tu salutis et virtutis

Doctrix es et formula.

13. Margaritum exquisitum,

Agnes, virgo nobilis,
Super aurum et thesaurum

Omnem delectabilis,
O beata, Deo grata,

Candens, fraglans lilium,
Magnum magna, agnum agna,

Sequens Dei filium.

14. Quorsum vadit, non evadit,

Cursum velox sequeris,
Roborari, non lassari

Ab hoc cursu poteris;
O quam plaudis, quando audis:

Surge, sponsa, propere,
Tibi gratum et amatum

Sponsum circumplectere.

15. Quis, benigne Iesu, digne

Hoc edicat gaudium,
Agnes freta quo iam laeta

Nullum habens medium,
Quo dilecto et electo

Fruitur ex milibus,
Concupitis et mellitis

Haerens in amplexibus.

16. Felix illa, de ancilla

Quae sic liber redditur,
Ut sponsetur, copuletur,
Cui mundus subditur:

Felix ausus et adplausus,
Omui laude pulchrior,

Tuus tibi cum se sibi
Dulci iungit dulcior.

17. Puellare singulare

Decus decentissimum,
Per amorem et dulcorem

Peto iucundissimum,
Quo abundas, ut effundas

Pro me preces misero,
In te spero, tuus ero,

Nam etsi peccavero,

18. Tuum erit, nemo perit,

Pro quo tu rogaveris,
Non cessabo, sed orabo,

Donec me audieris;
Tu in Deo cordi meo

Facta es iucunditas,
Hilarescit, cum quiescit

In te mea caritas.

19. Tu scis sane, quod te plane

Toto corde diligo,
Excusare tu dignare

Bona, quae heu negligo,
O puella mea bella,

Et incursus hostium
Tu fugato tribulato

Mihi dans auxilium.