26. De sancta Agnete.

1. Ave, Agnes generosa,
Romanorum rubens rosa

Prodiens ex genere,
Quae aetate tenerosa
Claruisti fructuosa
In virtutum opere.

2. Docta fide christiana,
Simulacra spernens vana

Suis cum dulcoribus,
Parvipendens post mundana,
Deum docens mente sana

Venerandum omnibus.

3. Me in fide serva recta,
Dulcis virgo, mi dilecta,

Te exoro precibus,
Caritate da perfecta
Deum, per quem es electa,

Colere prae omnibus.

4. Ave, Agnes verecunda,
Casta, pura, tota munda

Criminum a vitiis,
Temptamenta furibunda,
Hostem vincis laetabunda
Dei beneficiis.

5. Spreto sponso saeculari
Polluenda lupanari

Duceris malitia,
A quo nequis inquinari
Custodita singulari

Angeli custodia.

6. Dulcis virgo et decora,
Deum pro me semper ora,

Te instanter rogato,
Et servare me labora
Impollutum omni hora,

Ad te, pia, clamito.

7. Ave, Agnes pulchra tota,
Intus, foris sine nota
Omnis immunditiae,
Firma mente ac devota
In adversis non fis mota
Tramite iustitiae.

8. Ignis flamma tormentata
Et acerbe flagellata

Es pro Christi nomine,
Post cervice detruncata,
Martyr Deo consecrata

Proprio in sanguine.

9. A te, virgo mitis, peto,
In adversis vultu laeto

Confer patientiam,
Post caelorum in secreto
Corde mihi cum quieto

Dona permanentiam.

10. Ave, Agnes fructuosa
Tua morte pretiosa

Facta Christi hostia,
Peccatorum gratiosa,
Universis dulcorosa
Positis angustia,

11. Iam in caelo collocata,
Stola alba decorata

Agnum sine macula
Sequens, laude praemiata,
Cum Maria deputata

Es nunc digna famula.

12. Magnam in te spem habentem
Tuum Agnes ad clientem,

Supplico, nunc respice,
In peccatis dormientem,
Usque huc non paenitentem,

Pia, tu non despice.

13. Sed festina tua prece
Liberare me a faece

Peccatorum omnium,
Ne aeterna damner nece,
Sed caelestis apothecae
Dignum fac me socium.

14. Ut de dulci tecum vino
Caritatis in camino

Laete queam bibere,
In caelesti crystallino
Abs timore serpentino

In aeternum vivere.