48. De sancto Augustino.

1. Sancte pater Augustine,
doctor beatissime,
Pastor pie, fons divine,
preces meas suscipe.
2. Apud Deum semper stude
pro me intercedere,
Ut locare me dignetur
in caelesti requie.

3. Per te omnis est destructa
pravitas haeretica,
Roborata et firmata
fides est catholica.
4. Dictis tuis atque scriptis
pascitur ecclesia,
Ne per famem verbi Dei
deviet in vitia.
5. Doctor summe, doctor clare,
clippeus iustitiae,
Sordes a me procul pelle
totius perfidiae.
6. Assint mihi preces tuae
clarae et egregiae,
Ne nocere mihi queant
daemonis insidiae.

7. Pro peccatis meis multis
cruciari timeo,
Nisi tua illa sancta
deleat oratio.

8. Cor accende meum tuae
in amorem regulae,
Ut a vitae regularis
non recedam tramite,
9. Optans gratiam deflendi,

quae mutavit Augustinum
Ipsum trahens de inferno
et perficiens divinum.

10. Quando flumen lacrimarum
relaxavit largiter,
Cuncta rerum mundanarum
despexit viriliter.

11. Mater sancta, mater pia,
Monica gratissima,
In fervore cordis tui
Christo devotissima,

12. Deus sursum te audivit
maerentem pro filio
Et respexit fidem tuam
pietatis oculo.
13. Ergo, mater, quae ploravit
remotum a gratia,
Per te merear portari
in superna gaudia.
14. A culparum me mearum
liberatum pondere
In beato angelorum
agmine constitue.

15. Omnes sancti confessores,
pro me preces fundite
Deo patri atque nato
cum sancto spiramine.