51. De sancta Barbara.

1. Salve, Iesu generosa,
Orta stirpe speciosa,

Virgo martyr Barbara,
Sponsa Christi gloriosa
Atque neptis amorosa

Mariae per aethera.

2. Salve, fausta praedicatrix,
Et glorifica laudatrix

Sacrosanctae trinitatis,
Miserorum relevatrix
Ac servorum contutatrix

In hora neccessitatis.

3. Salve, prima post Mariam
In supernam hierarchiam

Habes thronum gloriosum,
Omnibus te praebens piam,
Qui mortalem pergunt viam,

Dans solamen gaudiosum.

4. Salve, meritis praeclaris
Quae prae cunctis veneraris

Post parentem Domini,
A Iohanne baptizaris
Signo doni singularis

Nulli dato homini.

5. Salve, vitae fers octena,
Christi virgo, fide plena,

Omne genus tormentorum,
Sole magis nunc serena
Paradisi per amoena

Civis facta supernorum.

6. Salve, privilegiorum
Singularitas tuorum

Orbi claret crebrius,
Ob quae amor te cunctorum
Grandium ac pussillorum

Recolit celebrius.

7. Salve, nullis sacramentis
Tibi pie obsequentis

Fraudatur affectio,
Hoc ostendit argumentis
Ac exemplis imminentis

Temporis collectio.
8. Salve, virgo praedilecta,
Manu iuves me porrecta

Largire finaliter,
Ut a carne mens avecta
Mox in caelo sit collecta

Gaudens aeternaliter.