57. De sancta Barbara.

1. Barbara, virginitatis
Decus, cultrix trinitatis,
Carens vitii quaerela,
Orta clara parentela,
Sponsa Christi placida.

2. A primaeva iuventute
Crevit fervens in virtute,
Luce morum exemplaris,
Sanctitate singularis,
[ Caritate fervida].

3. Res innotuit parenti,
Qui furore vehementi
Christi virginem vexavit,
Crine traxit, castigavit,
Mancipavit carceri.

4. Beluino furens more
Ipsam carceris squalore
Tribulatam foris duci
Iussit et tormento truci
In aperto conteri.
5. Acres poenas mamillarum,
Ungues, flammas lampadarum,
Probra, vincula, flagella
Fortis superat puella
Fidei constantia.
6. Requievit haec beata
Manu patris decollata,
Carnis sarcina eiecta
Consors sanctis est effecta
In superna patria.

7. Apud Christum, o decora,
Pro peccatis nostris ora,
Ut finitis his caducis
Donet nos aeternae lucis
Contemplari gaudia.