61. De sancta Barbara.

1. Adest triumphus nobilis
Festumque caeli curiae,
Quo rosa delectabilis
Offertur regi gloriae.

2. Gaudet chorus caelestium,
Cum scandit astra Barbara,
Caeligenarum epulis
Fruitura perennibus.

3. Hodie namque thalamo
Copulata nuptiali
Est corona decorata,
Bonis ineffabilibus.

4. Nunc pange, lingua, virginis
Sacratae huius proelium,
Merita, laudes, triumphum,
Quo vicit hostem fortior.

5. Haec carne solo posita,
Mente polo contigua,
Vitae reclusit tenebras,
Fulgorem nacta caelitum.

6. Medicus adest animae,
Visitans docet, abluit.
Imperio Diosocri
Contempto trinam fieri

7. In trinitatis nomine
Fenestram iubet lucidam,
Reversus audit genitor,
Confracta dolet idola.

8. Arrepta spata filiam
Mactare saevus nititur,
Sed intus petra suscipit
Iaciens in monticulum.

9. Pastore ab uno proditam
Crinibus trahit hanc pater,
Flagellat, ligat, carceris
Taetro claudens ergastulo.
10. Martiano nuntiantur
Praesidi gesta Barbarae,
Suadens, ut sacrificet,
Blanditur, saevit impius.

11. Abnegat sponsa constanter,
In laudis sacrificium
Fervore mentis intimo
Se offerens plene dilecto.

12. Furit praeses furibundus,
Nudari iubet lilium,
Verberat miles, lacerat
Taurinis nervis intima.

13. Nudata pendent viscera,
Sanguis sacratus funditur,
Immobilis sed permanet
Vitae perennis gratia.

14. Clauditur hinc in carcere,
Mox adest sponsus gloriae
Confortans luce comiter,
Sanata plagis fruitur.

15. Angelorum melodiis,
Confortata tripudiat,
Eductam tradit impius
Crudelibus tortoribus.

16. Latera furcis fodiunt,
Lampade cremant viscera,
Caput, os tundunt malleo,
Mammas evellunt pectore.

17. Trahitur in spectaculum
Nuda per plebis compita,
Stola sed missa caelitus
Divina gaudens tegitur.

18. Nec moras dirus patitur,
Rapuit sanctam genitor,
Ut perdat ducens Barbaram
Montis in supercilium.

19. Intimo corde Dominum
Precatur flexo poplite,
Vox vocat: veni, propera,
Festina, coronaberis.

20. Vibrat ensem truculentus,
Tollit caput Dioscorus
Mucrone fundens sanguinem,
Sed illum flamma devorat.

21. Assunt cives supernorum
Suavibus efferentes
In nuptiali thalamo
Sponsam regis amplexibus.

22. Te nunc, beata, quaesumus,
Nobis deposce veniam,
Fidem, spem, pacem, gratiam
Veramque paenitentiam.

23. Honor, decus, imperium
Sit trinitati unicae,
Patri, nato, paraclito
Per infinita saecula.