ARTICULUS II.

An caelum Trinitatis sit idem quod Deus ?

Secundo quaeritur, Utrum sit idem quod Deus?

Et videtur, quod non : quia

1. Dicit Philosophus in IV Physicorum, quod " nihil est in seipso per se . " Cum ergo Deus sit in caelo Trinitatis, et non sit in aliquo per accidens, quia nec aliquod accidens ei convenit, caelum Trinitatis non erit idem Deo.

2. Item, Dicitur in Isaia, 1 : Caelum mea sedes, terra autem scabellum pedum meorum. Constat autem, quod Deus est in coelo illo quod est sedes ejus. Cum ergo dividatur contra terram, et terra sit creata, necesse est caelum esse creatum.

3. Item, Dicit Philosophus in libro I de ''Caelo et mundo , quod omnes primi conveniunt in hoc quod Deus est in coelo.Et

constat, quod loquitur de caelo creato, et illud est caelum Trinitatis in quo est Deus. Ergo caelum Trinitatis est creatum : et nihil creatum est Deus : ergo caelum Trinitatis non est Deus.

Contra :

Deus est in caelo Trinitatis : et caelum Trinitatis non est corpus, ut habitum est : ergo Deus est in ipso tamquam in substantia, vel accidente spirituali, Si tamquam in substantia diversa ab eo, sequitur quod sit substantia diversa a Deo continens Deum, quod est haereticum. Si tamquam in accidente, tunc aliqua forma accidentalis continebit eum, quod est magis haereticum.

Solutio. Dicendum, quod caelum Trinitatis est idem Deo secundum rem, differens secundum rationem : est enim caelum Trinitatis nihil aliud quam excellentia virtutis ejus, quae continet et ambit omnia creata.

Ad primum ergo dicendum, quod esse in seipso duobus modis dicitur, scilicet per affirmationem, et negationem. Per affirmationem nihil est in seipso : quia oporteret, quod idem esset continens et contentum, quod non potest esse. Per negationem vero aliquid est in seipso, id est, non in alio, sicut omnia prima qua3 non continentur, sed continent alia : et sic Deus est in seipso. Vel, potest dici melius, quod nihil est in seipso idem secundum rem et secundum rationem : sed aliquid est in seipso idem secundum rem, et differens secundum rationem : et sic Deus est in caelo Trinitatis. Sicut enim sapientia et virtus Dei idem sunt secundum rem, sed differunt ratione : sic Deus et coelum Trinitatis idem sunt secundum rem, sed. differunt secundum rationem. Quae autem sit illa ratio, determinari hain quaestione de attributis.

Ad aliud dicendum, quod coelum dici-

tur ibi coelum empyreum, et dicitur esse sedes Dei ratione contentorum : quia quiescit in caelis, scilicet in beatis. Terra autem dicuntur ibi terreni, quos Deos conculcabit pedibus suis tamquam se indignos, ne sedeant cum principibus et gloriae solium teneant.

Ad aliud dicendum, quod antiqui attendunt quamdam congruentiam : in minimo enim corpore simplicissimum caelum secundum substantiam est eodem modo se habens : et ideo dederunt ipsum locum Deo, qui idem ipse est, et anni sui non deficiunt : non quia sit proprius locus ejus, sed quia in genere corporum magis habitationi suae convenit.