65. De sancto Bemhardo.

1. O odorifere narde,
Beate pater Bernarde,
Pacis nostrae disciplina,
In te luxit lux divina.
O lilium mirificum,
Dans odorem vivificum
Decusque religionis
Et forma perfectionis.

2. Loquens ut Esdras altius,
Ex te redundans fluvius
Manavit sapientiae,
Fluenta quidem gratiae
Propinasti in populo,
Ignis effulgens saeculo,
Thus redolens caritatis,
Oliva suavitatis.

3. Vas auri summum nobile,
Claram, profundum, ductile,
Humilitatis viola.
Strenua virtutum scola,
Heres aeterni nominis,
Impetus tui fluminis
Ecclesiam laetificat,
Gregem tuum sanctificat.

4. O pastor gregis pauperis,
Tuis adesto posteris,
Protege nos et refove,
Vitia cuncta remove,
Succurre sanctis precibus
Tuis, pater, supplicibus.

5. Nobis confer subsidium,
Tuarum voces ovium
Audi, exaudi, domine,
Et apud Deum obtine,
Ut gratiam largiatur,
Et in nobis augeatur
Religio et sanctitas,
Devotio et caritas.

6. Mei, pater sanctissime,
Memor esto maxime,
Tuo interventu pio
Munder ab omni vitio,
Ut virtus in me vigeat,
Perseveret et maneat,

Et te duce perveniam
Ad caelestem patriam.