77. De sancta Clara.

1. Ave, mater humilis,
Ancilla crucifixi,
Clara, virgo nobilis,

Sponsa Iesu Christi,
Ad caelestem patriam
Fac nos proficisci.
2. Claritatis lilium,

Clara clarens stella,
Virtutum sacrarium,

Transfer, mater bella,
Nos ad Dei filium,
Pigmentorum cella.

3. Gloriosa virgo, stella

Clara matutina,
Rosa rubens, carens spina,

Gemma virginea.
4. Claritatis speculum,

Clara, per omne saeculum
Clares cum sponso gloriae

In claritate Christi,
A vetustate scoriae
Nos emandes, memoriae

Tuae quos stabilisti.

5. Clara Dei famula,
Tenera infantula,
Cilicii baiula,
Vivens sine macula.

6. Tu forma humilium,
Castitatis lilium,
Sanctitatis speculum,
Novum per prodigium
Mariae vestigium
Ac eius sequens filium.

7. Ave, rosa venustatis,
Fune cincta castitatis,
Nova plantans lilia
Francisci pia plantula,
Clara, Mariae filio
Iesu Christo tam pio
Nos commenda per saecula.

8. Ave, thronus Salomonis,
Quem ornavit suis donis
Ac replevit multis bonis,
Quibus clare claruit,
Quod virtutum habuisti
Sacrum septenarium.

9. Ave, cedrus altissima
Et arbor pulcherrima"
Poma ferens optima,
Omni odore suavissima.

10. Ave, cupressus ramosa,
Cuius umbra gratiosa
Confert aegris refrigerium.

11. Ave, nardus odorifera,
Frutex aromatica,
Virgo clara, cassia
Vera non sophistica.

12. Eia, mater, tua prece
Peccatorum cor o faece,
Clara, nostrum emundetur
Ac in bono solidetur
Tuum per subsidium.