79. De sancto Corbiniano.

1. Ave, pastor et patrone
Felix pontifexque bone,
Corbiniane pater, ave,
Mihi peccatori fave,

2. Preces meas admittendo
Et obnixe deducendo
In effectum, quidquid peto.
Te accedo corde laeto

3. Supplicando studiose,
Ut tu praesul gloriose
Atque Dei tu confessor,
Pias mihi intercessor

4. Apud Dominum Iesum Christum,
Ut non fallar per mundum istum,
Et quod hactenus est comissum,
Non me demergat in abyssum.

5. Ne delinquam rursus prave,
Cor ad Deum sursum trahe,
Ut in praesenti et futuro
Amem ipsum corde puro.

6. Corde, voce laudem Deum,
Reflectendo super eum
Omnes vires et conamen
Suum exorando nomen.

7. Ut excessus sic deplangam,
Ut non post hanc vitam longam
Pro peccatis feram poenam,
Invitari fac ad cenam,

8. Ubi nullus est defectus,
Ut ibidem sim electus,
Angelis corregnaturus
Et a malo sim securus.

9. Amen; illud idem, pie
Iesu, fili da Mariae,
Pater atque sacrum flamen,
In caelesti Hierusalem.