81. De sancto Cuthberto.

Salve, sancte pater, Cuthberte, vir inclite, recti

Norma, pater patriae, cura salusque tuae.
Salve, dulce decus, salve, spes magna tuorum,

Virtus nostra, vale, vir pietatis, ave.
, Sit tibi laus, tibi dignus honor, tibi gratia detur,

Qui licet indigno das bona saepe mihi.
Tu mihi magna salus, mihi gloria saepe fuisti,

Tu me dulcifluo semper amore foves.
O quot saepe malis, quibus hostibus atque periclis

Me, pater, ereptum prosperitate foves,
Et tibi quid dignum reddam, pater, o pie praesul?

O pater, o clemens pastor, adesto mihi,
Ut placet, et nostro, pater, auxiliare parenti,

Auxiliare mihi, dulcis amice Dei.