87. De sancta Dorothea.

1. O miranda Dorothea,

Novum sensum in me crea,

Tenacem memoriam
Peccatorum, mater vera,
Confer mihi verba mera,

Dulcem eloquentiam,
Et ne damnet me mens rea,
Me virtute tua bea

Dando confidentiam.

2. Supplicamus, nos tuere,
Martyr sancta, confer verae
Tempus paenitentiae,

Virgo bona, crimen tege,
Victum dona, mores rege,
Ne damnemur gravi lege,
Da spem indulgentiae.

3. Pugil Christi, Dorothea,
Tua nos virtute bea,
Cor in nobis mundum crea
Cum condigno praemio;
Deum nobis fac placatum,
Ut post huius mundi statum
Vitae locum det optatum
In caelesti gremio.