93. De sancta Erentrude.

1. Salve, rosa puritatis,
Viola humilitatis,
Cuius folia virtutum
Multis monstrant iter tutum

Ad caeli tripudia,
Agnum sequens sine menda
Tu, Erntrudis reverenda,
Stola candida ornata,
Christi sponsa, virgo grata,

Sprevisti propudia.

2. Nardum pisticum sincerum,
Fidei te lumen verum
Sancta vita fulguravit,
Ac religio mundavit

A peccati scoria;
Castitatis tu saphirus,
Non gustasti luxus virus,
Pudicitiae ac cella,
Honestastis fulgens stella,

Gaudens nunc in gloria.

3. Thyma caritatis suavis,
Liberalitatis clavis,
Gratiarum largitudo,
Pietatis mansuetudo,

Rivus indulgentiae,
Ancora tu nostrae spei
Gaudiumque requiei,
Aeternorum contemplatrix,
Legis Dei vera latrix,

Scutum patientiae.
4. Eructasti verbum bonum,
Unde sponsi tui thronum
Introisti exsultando,
Sapienter vigilando

Cum gnaris virginibus.
Recreatrix tu lassorum,
Fortitudo prolapsorum,
Fervens Dei ac hymnista,
Bene sonans cymbalista

In sacris carminibus.

5. Nobilis ex stirpe clara,
Claritas virtutum cara,
Generosa in sophia,
Es fecunda sicut Lia,

Ferens fructus caelicos.
Doctrix Dei disciplinae,
Vias vitans vagas Dinae,
Sanctitatis vitae forma,
Cunctarum virtutum norma,
Regulans famelicos.

6. Rectrix Christi ancillarum
Fuisti ac lumen clarum
Coruscans in Dei templo
Fide, verbo et exemplo

In mandatis Domini;
Vitam tu contemplativam
Cum Maria et activam
Cum Martha sollerter ducens,
Lux in mundo grata lucens

Es utrique homini.

7. Doctrix sagax et diserta,
Debora ut tutrix certa,
Vernas tuas tu defensas
Et tutelas fers immensas

In te confidentibus.
In aeternum benedicta,
Cum sit gratia non ficta
Tuis labiis diffusa,
Recta via, non illusa,

Es te reverentibus.

8. Soror dulcis angelorum,
Carens thoro delictorum,
Fructum habens tu sanctorum

Ornata monilibus.
Odor bonus tuae vitae
Te ad caelos duxit rite,
Ubi veste deaurata
Et a rege coronata

Exsultas in milibus.

9. Plena largitatis vena,

Pulchra tota et amoena,

Largas manus extendisti

Ad egenos, quos pavisti

Multum liberaliter.

Evangelii fluenta
Potasti mente intenta,
Horrens Babylonis potum,
Mortis felle plenum totum,
Vivens tu frugaliter.

10. Mater es dilectionis
Pulchrae et agnitionis,
Virgam Christus, rex Assuerus,
Ad te pius et sincerus

Est extendens auream.
Floribus morum venusta,
Columna Dei augusta,
Audi, filia, et vide
Te remuneratam fide

Per caelestem lauream.

11. Es amica pulchra tota,
Macula ab omni lota,
Annulo te subarrhavit
Christus atque trabeavit

Te in sponsam eligens;
Rex decorem concupivit
Tuum, cum te castam scivit.
In procellis naufragantes
Huius mundi et clamantes

Ad te salva erigens.

12. Tempestatis dulcis portus
Ac amoenitatis hortus,
Sion filia formosa,
Sine spina vernans rosa,

Tu convallis lilium.
Nubes tegens a calore,
Nos in tuo duc amore,
Medicinae distributrix
Miserorum ac adiutrix,

Salvatrix humilium.

13. Ueritatis tu lucerna,
Luce bea hic superna
Invocantes te devote
Liberaque tua dote

A gehennae aestibus.
Dilecta, decora nimis,
Sponso tuo, nos in imis
Fac peccata nunc deflere
Et post mortem congaudere
Tibi in caelestibus.

14. Iugum Dei tu portasti
Suave, sub quo militasti,
Nunc triumphans es in caelis,
Nobis miserere velis,
Rogo te piissimam.

Saffragatrix, precor, fortis
Sis in hora nostrae mortis,
Et succurrat nobis, amen,
Sponsus tuus, amen, amen,
Per te excellentissimam.