105. De sancto Hieronymo.

1. Exsultet caelum laudibus
Et omnis terra iubilet,
Corde, voce et mentibus
leronimumque concinet.

2. O vere lux Italiae,
Ieronyme sanctissime,
Decus sanctae ecclesiae
Et doctor verus optime.

3. O virgo et flos virginum,
O sanctitatis vasculum,
Tu castitatis speculum,
Decus, corona et lilium.

4. O forma paenitentiae
Eremique angelici
Norma et abstinentiae,
Martyr mentis martyrii

5. Tu post Iohannem praevium,
Qui demonstravit Dominum,
Tenes caelum empyreum,
Dei regnum perpetuum.

6. Tu exstirpator omnium
Errorum, tu et schismatum,
Tu confudisti omnia
Per argumenta lucida.

7. O Bethlehem amplissima,
Quae filium Ieronymum
Nutristi, o piissima,
Tam sanctum et egregium.

8. Tu sacrosanctas fidei
Interpretator lucidus,
Tu doctrinarum splendidus
Largitorque magnificus.

9. Tua doctrina caelica

Splendet per mundi climata,
Lux pellens cuncta schismata,
Omni luce clarissima.

10. O sacra lux Ieronyme,
O pater beatissime,
Tu confessorum omnium,
Es splendor et lux mentium.

11. Tu omni clero ferculum
Dedisti salutiferum,
Vere cibum angelicum,
Omni melle dulcissimum.

12. Quis te posset omnimode
Laudare, mi Ieronyme,
Quis tuae sapientiae
Grates posset uberrimae.

13. O monachorum gloria,
Eremita angelicus,
Tu mundo es divinitus
Datus a Deo caelitus.

14. Quis gradus in ecclesia
Tua non gustat pocula
Dulcia et melliflua,
Divina ac magnalia.

15. Tu sacratis virginibus
Normam vivendi nobilem
Exemplis mirabilibus
Dedisti et immobilem.

16. Tu viduis et clericis,
Tu monachis et laicis,
Tu cunctis famulantibus
Deo dedisti pabulum.

17. Tu fluvius scientiae
Et doctrinarum rivulus,
Tu schola sapientiae,
Vere doctor eximius.

18. Quis posset tot volumina
Hebraea et Arabica,
Graeca quoque Chaldaica
Interpretare lucida?

19. In te effudit caelitus
Ardor divini spiritus,
Ut tot proferres grandia
Et vere mirabilia.

20. O quis laudare valeat
Ieronymum sanctissimum,
Vere patrem piissimum,
Vas auri splendidissimum V

21. Gaude, Bethlem sanctissima,
Et tu, tota Italia,
Gaudete, quaeso, invicem
Nutrisse tantum apicem.

22. O gloria tuae patriae
Et Dalmatiae bonitas,
O rosa et flos Italiae
Et virtutum immensitas.

23. Tu moniales vigiles
Devotas fac et humiles,
Ut te devotae et sedulae
Laudent, pie Ieronyme.

24. Quaeso, o pater inclite,
Ipsas devote protege,
Ab omni malo et crimine,
Dulcissime Ieronyme.

25. O pater celeberrime,
Alme, grate Ieronyme,
Exaudi, tuae servulae
Quas dant preces humillimae.

26. Tu sis, qui veris brachiis
Sustines templum clericis
Nec non et Christi laicis
Undique seras aperis.

27. Tuis devotis famulis

Praesto, mi pater, subveni,
Ut precibus continuis
Sint tuo amore fervidi.

28. Audi sua precamina
Et dimitte peccamina,
Solve nexorum vincula
Et da quieta tempora.

29. Per te renuent devia
Et cuncta nocibilia
Suaque desideria
Erigant ad caelestia.

30. Per te patrem et filium
Sanctum agnoscant spiritum
Et tua prece sedula
Ducantur ad caelestia.

31. Gloria patri Domino
Et suo sancto Ieronymo,
Qui cum Iesu unigenito
Semper regnat cum gaudio.