108. De sancto Hieronymo.

1. Hymnos, psalmos concinamus
In laudem magnifici

Ieronymi et colamus
Eum corde simplici,

Qui crevit ut cedri ramus
Hic fructu multiplici.

2. Parvo victu refraenavit
Carnis petulantiam,

Sacco tectus et calcavit
Omnem arrogantiam

Et de saevo reportavit
Sic hoste victoriam.

3. Lucta pervenit frequenti .

Ad cordis munditiam,
Per quam Deo excellenti

Placuit, qui gratiam
Illius infundit menti,

Lumen et scientiam.

4. Legis interpres divinae

Fidelis enituit,
Ex Hebraeo quam Latine

Discrete transposuit,
Unde laudem sine fine

In templo promeruit.

5. Haereticos expugnavit

Linguae comptae gladio,

Contra pravos et dictavit
Mores zelo nimio,

Quare plures provocavit
Contra se in odio.

6. In Bethlehem consummavit
Cursus sui stadium,

Ubi virgo reclinavit
Dei patris filium,

Et ad id, quod praelibavit,
Assumptus est gaudium.

7, Signis eum illustravit
Miris post interitum

Christus, per quae propalavit
Magnum vitae meritum

Eius et quod ambulavit
Iuxta suum placitum.

8. Perduc, doctor, ad amoenam
Exsulantes patriam,

In qua sancti cantilenam
Canunt luctus nesciam,

Summae trinitatis plenam
Contemplantes gloriam.