113. De ss. Iacobo et Philippo.

O vos Iacobe, Philippe.

Principes festivi, quippe

Paschalis iucunditatis,

Vernalis amoenitatis,

5. Combinati estis bene

Causa caritatis plenae.

O Philippe, sidus factus

Mox es fratrem tuum nactus,

Inclitum Nathanaelem,

10. Quem fecisti tu fidelem

Sub ficu inveniendo

Et ad Iesum perducendo;

Factus es consiliator,

Quando Christus miserator

15. Quinque milia virorum

Pastu pavit hordeorum.

Patris vultum tu petisti,

Satis esse tunc dixisti,

Multos aegros tu sanasti,

20. Mortuos tres suscitasti,

Effugusti et draconem,

Scythiam sic regionem

Tu docendo convertisti;

Tandem obis, ut cupisti,

25. Ad instar robusti ducis

Equitando sellam crucis,

Quam rex prius equitabat,

Per hanc te perhonorabat.

Iacobe, tu frater Christi,

30. Similis per totum isti

Vultu, membris, sanctitate

Et in morum honestate,

Iam sub infantili aevo

Liber a mortali naevo.

35. Infans tu infantis Christi

Conversalis exstitisti,

Virgo manens, sanctus natus,

Iustus dictus, cunctis gratus.

Balnea pro disciplina

40. Vitans, carnes atque vina,

Totiens geniculatus

Magnis crustis es gravatus.

Tuae magnae sanctitatis,

Nimiae sinceritatis

45. Omnis plebs tunc erat testis

Tangens oram tuae vestis,

Pro devotione pura

Et pro sanitatis cura.

Ex favore populorum

50. Prae coetu apostolorum

Templum solus tu intrabas,

Primus missam celebrabas,

Ab apostolis praeclaris

Primus praesul exaltaris;

55. Arce templi post deiectus

Lapidaris, vix erectus

Super genua petisti

Pro ignaris morte Christi.

Tandem quodam a maligno

60. Cum fullonum grosso ligno

Super caput verberatus

Dire sic exterebratus,

Cerebrum tunc cum cruore

Fluxit simul cum horrore.

65. Sic cura palma laureatus

Es in caelum exaltatus.

O patroni ambo clari,

Sitis mihi non amari

Me a malis protegentes

70. Et in bonis promoventes,

Ut me mortis in agone

Liberetis a dracone.

Nunc et tunc sic tutus morer

Per vos, ne ab ipso vorer,

75. Sed securam me ducatis,

Ubi mihi ostendatis

Tu, Philippe, vultum patris,

Iacobe, tu vultum fratris,

Ambo vultum sacri flatus,

80. Quibus visis sim beatus.

Unus trinus hoc optamen

Propter vos det mihi. Amen.