122. De ss. Iohanne Baptista et Evangelista.

1. Ave, gemma claritatis
Speculumque sanctitatis,
Mundi decus et lucerna
Dignitate sempiterna,
Virgo, martyr et symmista,
Iohannes, Christi baptista

2. Ave, virgo praeelectus
Et prae ceteris dilectus,
Cui amoris multa signa
Christus dedit laude digna,
Tibi Christus dedit ista,
Iohannes evangelista.

3. O quam pulchrae duae rosae
Et olivae speciosae,
O quam paeclara lumina
Et paradisi flumina,
O caelestes margaritae
Et honore redimitae.

4. Gabriel te nuntiavit,
Ipse Christus praedicavit,
Inter natos mulierum
Nemo maior, o quam verum,
In matre sanctificatus
Christi testis nondum natus.

5. Te custodem matri dedit,
Mors cruenta te non laedit,
Pectus Domini suxisti,
Mira Dei praevidisti,
Carne, spiritu beatus
Sic in caelum elevatus.

6. Tu puer plusquam propheta,
Firmans fidei decreta,
Dei agnum ostendisti,
Vocem patris percepisti,
Spiritum sanctum vidisti,
Trinitatem credidisti.

7. Aquila te figuravit,

Quis sanctorum sic volavit?
Te sol verus illustravit,
Ex te rivus emanavit
Mellifluae suavitatis,
Summae doctor caritatis.

8. O oliva speciosa,
Quorum vita gloriosa,
Columnna caelestis templi,
Expers flores et exempli,
Quorum merita beata
In conspectu Dei grata.

9. Vos virginalis gloria,
Martyrii victoria,
Tam vigens innocentia,
Virtutum excellentia,
Dignos nimis effecerunt,
Summa laude probaverunt.

10. O vasa electionis,
Sidera perspeciosa,
Vestris purgate precibus
Nos a peccati faecibus,
Omne bonum impetrate,
Nos a malis liberate.

11. Mementote miserorum
In valle periculorum,
Ne mergamur in infernum,
Sed vivamus in aeternum
Videntes Deum deorum
In saecula saeculorum.