129. De sancto Iuda.

1, Sanctum Iudam collaudemus,
Caeli civem celebremus

Condignis encomiis,
Particeps qui passionis
Dono retributionis

Gaudet cum apostolis.

2. Lumen erat et dux viae
Caecae genti et Mariae

Iunctus erat sanguine,
Habuit Alphaeum patrem,
Eius confitetur matrem

Se Maria Cleophae.

3. Duodenos eligebat

Christus, quibus decernebat

Munus apostolicum ;
Dei nutu deputatus
Est Thadaeus et relatus

In eorum numerum.

4. Tradidit hic mox divinam
Idololatris doctrinam

Docens eos impiger,
Per miracla, quae patravit,
Quod docebat, confirmavit,

Augens fidem fortiter.

5. Clara Iudae sunt portenta,
Quae confirmant instrumenta

Data ab Abagaro,
Huic a se baptizato,
Falsa fide liberato

Profuit auxilio.

6. Nec in animo curabat
Regem tantum, quod rogabat,

Iuvit et in corpore,
Reddita dum sanitate
Facta sibi potestate

Lepram iussit cedere.

7. Tuus zelus non quievit,
Sancte Iuda, qui non sprevit

Regionem Persiae,
Hic idola confundebas,
Fidem felix invehebas

Et Mesopotamiae.

8. Unde turba sacerdotum
Conabatur, ut te totum

Quovis modo perderet,
Cum te Christum praedicante
Non idolum sicut ante

Verba prompte redderet.

9. Dam tu cupis propagare
Christi fidem, te fugare

Dolus vult diaboli,
Cui tamen non cessisti,
Immo cunctis ostendisti

Vanas fraudes erebi.

10. Quidquid mundi contempsisti,
Quod cepisti, docuisti

Cum gentis solamine,
Operam non perdidisti,
Christo multos peperisti

Verbi Dei semine.

11. Quam zelose conscripsisti
Et qua multum profuisti,

Colimus epistolam,
In qua studes nos docere
Viam regiam tenere,
Quae ducit ad patriam.

12. Orbis tibi fert terrarum,
Sancte Iuda, nomen clarum

Praeconis eximii,
Dei te dicunt legatum
Vindicemque veritatum

Venerantur ethnici.

13. Tandem finis est dolorum,
Meta venit et laborum,

Larga tollis praemia,
Virtus tua triumphavit,
Numen mire te ornavit

Martyrum laureola.

14. Nam ab his, quos edocebas
Veram fidem, perferebas

Mortem cadens fustibus,
Vitam Deo reddidisti,
Sed sic polum subiisti

Gaudens cum caelitibus.

15. Apostole lectissime
Et martyr invictissime,

Iuda, preces clientis,
Ut consuevisti, respice,
Devote celer suscipe

Hanc pronitatem mentis.

16. Attende vim certaminis,
Virtutem pete flaminis,

Pro qua has preces promo,
Accedit finis staminis,
Horror venit examinis,

Non titubem in bono.

17. Semper me ad hoc animem,
Ne animam contaminem,

Quae meus est thesaurus,
Tu meus semper doctor sis,
Ne mihi sit cum Deo lis,

Sic mihi manet laurus.