132. De sancta Katharina.

1. Salve, virgo Katharina,
Sponsa Christi eximia,
Corpus meum et anima
Sub tua sint custodia.

2. Benigna patrocinia
Fer tuo servo, domina,
Per te Dei clementia
Expurget mea crimina,

3. O flos et honor virginum,
Amica Dei nimium,
Ora pro me ad filium
Mariae unigenitum.

4. Dilecti aures mulceat
Prex tua et efficiat,
Ut actus meos dirigat
A malisque custodiat.

5. Dulcedo sancti spiritus
Me regat tuis precibus,
Me impleat virtutibus
Tuis sanctis precatibus.

6. Sic tua in hoc saeculo
Me visitet oratio,
Ut Dei in servitio
Cor meum sit in gaudio.

7. Ac dignas laudes Domino
Decantem mentis iubilo,
Ut bona retributio
Mihi detur in ultimo.

8. Tu me fac bene vivere,
Ut in egressu animae
In Dei consolamine
Defungar sine crimine.

9. A morte subitanea
Tu me defende, domina,
Veraque paenitentia
Dones et eucharistia.

10. Et sic post hoc exsilium
Invita tuum famulum,
Caeleste ut palatium
Sit mihi in hospitium.

11. Assit mihi ad obitum
Tuum sanctum auxilium,
Ut laetus queam Dominum
Videre in perpetuum.