ARTICULUS III.

Utrum purgare, illuminare, et perficere, conveniant Angelis secundum distinctionem hierarchiarum, vel ordinum, vel personarum ?

Tertio quaeritur, Utrum conveniant eis secundum distinctionem hierarchiarum,vel ordinum, vel personarum?

Et videtur, quod ratione hierarchiarum : quia dicit beatus Dionysius de prima hierarchia quae est Seraphim et Cherubim et Thronorum, sic : " In primis essentiis quae post siibstantificam earum divinitatem collocatae sunt, et veluti in vestibulis ipsius ordinatae, omnem sunt invisibilem et visibilem superexcellenteis factam virtutem propriam aestimandum est esse et omnino aequiformem hierarchiam . " Littera sic ordinatur : propriam et omnino aequiformem hierarchiam aestimandum est esse in primis essentiis. Ex hoc accipitur, quod cum prima hierarchia tota sit aequiformis, non illuminat in ea ordo ordinem, vel

persona personam. Igitur cum Angelis conveniat purgare et purgari, etc, videtur, quod hoc conveniat eis ratione diversarum hierarchiarum, et non ratione unius hierarchiae.

Item, Habetur ex hoc quod vocat eam propriam hierarchiam : quod enim aliunde est, non videtur esse proprium.

Sed contra :

1. Dionysius dicit in libro de Caelesti hierarchia : " Et in aeque potentibus ipsa lex diffinitur ex superessentiali omnium ordinationis principio, hoc est, per unamquamque hierarchiam primas et medias et ultimas esse et ordinationes et virtutes et minorum esse diviniores doctores et manuductores in divinam adductionem et illuminationem et communicationem . ''" Ex hoc accipitur, quod in hierarchia aequipotente unus illuminat alium et perficit alium.

2. Item, Videtur, quod unaquaeque persona habeat alios actus ad seipsam, et ad aliam : quia ita dicit Dionysius in libro de Caelesti hierarchia : " Secundum seipsum unusquisque et caelestis et humanus animus speciales habet et primas et medias et ultimas ordinationes et virtutes ad dictas per unumquemque hierarchicarum illuminationum proprias anagogas. Hierarchicarum illuminationum anagogas dico dictas per unumquemque Angelum . " Ex hoc habetur, quod quilibet Angelus potest seipsum illuminare ex anagoga illuminationis superioris, et potest illuminare etiam alium Angelum secundum illuminationem inferioris anagogae.

Solutio. Dicendum, quod hierarchia hierarchiam potest illuminare, et ordo ordinem, et persona personam, sed non persona seipsam.

Ad primum autem dicendum, quod tres ordines in prima hierarchia dicuntur aequiformes quantum ad actum proprium hierarchiae, de quo dicetur inferius : sed non sunt aequiformes quantum ad illuminationes speciales.

Ad aliud dicendum, quod hierarchiae dicuntur propriae, quae sunt in primis tribus ordinibus : eo quod non habentur nisi a solo Deo. Aliae autem inferiorum habentur etiam ab Angelis secundum quemdam modum.

Ad ultimum dicendum, quod non intendit Dionysius, quod Angelus seipsum illuminet : sed in quolibet Angelorum sunt triformes illuminationes appropriabiles tribus hierarchiis, quod planum erit in sequentibus.