143. De sancta Katharina.

1. O Katharina nobilis,
Virgo gloriosa
Martyr et immobilis,
Florens velut rosa.

2. Costi regis filia
Fuisti procreata,
Sed divina gratia
Salubriter renata.

3. Aetate iuvenili

Christicola fuisti,
Ingenio subtili

Frequenter studuisti.

4. Corpus tuum nobile
Deo obtulisti,
Donum ineffabile
Te ipsi tradidisti.

5. Castitatis annulo

Te Christus subarrhavit,
Qui te amoris vinculo
Dulciter amavit.

6. Sponsa sponso iungitur,
Fovens mente pia,
Neutrum quoque fallitur
Hic a recta via.

7. Cum pudoris lilio
Fuisti famulata
Sponso tuo supplice,
Cui eras grata.

8. Hoc idem cum senserat
Maxentius praeceptor,
Ad eum te vocaverat
Perversae legis lector.

9. Mox cum te cognoverat
Vernam esse Christi,
Te carcere recluserat
Sicque permansisti,

10. Donec a tortoribus
Educi te mandavit
Ac legis perversoribus
Te examinavit.

11. Sed virgo constantissima
Omnes superasti
Omniumque doctissima
Eos profanasti.

12. Fidem sponsi incliti

Ferventer praedicando
Iniquique Maxentii
Deos blasphemando

13. Eius nuptam perfidam
Ad Deum convertisti
Atque turbam maximam
Sequentem legem Christi,

14. Porphyrium, familias
Christum profitentes
Multasque plebeculas
Sibi adhaerentes.

15. Maxentius cum sensiit
Tanta te fecisse,
Animo tristi doluit,
Se nihil perfecisse.

16. Ergastulo te reddidit
Custodibus armatis,
Te fame mori credidit
Panibus non adlatis.

17. Cibisque angelicis
Mire pascebaris
Gaudiis ac caelicis
Laute laetabaris.

18. Imperator impius

Credidit te morti datam,
Sed sponsus eximius
Te paravit sibi gratam.

19. Videns hoc perfidus

Te morti condemnavit,
Quam potuit celeriter
Rotam ordinavit.
20. Rotam cum perfecerat
Rallis adornatam,
Te subire voluit
Deo dedicatam.
21. Amore sponsi incliti,
Virgo, inflammata,
Tormento supplicii
Fuisti praeparata.
22. Sed tuam continentiam
Sponsus demonstravit,
Per machinae sententiam
Tortores devastavit.

23. Tandem sponso patuit
Nuptias sacrare,
Cum tyranno placuit
Te capite truncare.

24. Pie flectens genua
Christum exorasti
Emittensque suspiria
Spiritum commendasti.

25. Lictor fert gladium,
Sed virgo genuflexa,
Ictum duxit validum,
Ab angelis est amplexa.

26. Duceris ad nuptias

Ingenti cum honore,
Ad paradisi portas
Sponsuli cum decore.

27. Corpus tuum digne
Mirifice portatur
Sepeliturque benigne,
Ut nobis praesentatur,

28. In montis pinnaculo
Sinai vocati,
Nobis pro signaculo
Prae cunctis elevati.

29. Passionis tuae gloriam,
Virgo, decantantes
Per daemonis victoriam
Fac nos triumphantes,
30. Ne redemptoris gratia
A lapsu relevatos
Temptatoris retia

Reddant condemnatos.
31. Literarum studiis
Fac nos militari
Earumque industriis
Te semper imitari,
32. Castitatem floridam

Christo praesentare,
Tremendam atque horridam
Poenam evitare.
33. Ad sponsi tui nuptias
Valeamus famulari,
Post huius mundi tenebras
Te dein contemplari,
34. Humanas contumelias
Patienter sustentare,
Ut paradisi portas
Dignemur visitare.

35. A vinculis nos protege,
Virgo gloriosa,
Ne valeat nos laedere
Mens opprobriosa.

36. Nulla morte celeri

Permittas nos perire,
Nusquam poenam tartari
Hostiliter subire.

37. Quousque in hoc exsilio
Sumus duraturi,
Mariae matris filio
Vivamus sorde puri.

38. Cum instat dies horrida
Ac necis inest hora,
Virgo, prece florida
Pro nobis implora,

39. Ut nuptiis sponsalibus
Valeamus interesse
Atque commensalibus
Asscribi stirpis Iesse.