151. De sancta Margareta.

1. Ave, virgo gloriosa,
Ave, rosa [speciosa],

Margareta nobilis,
Ave, plena caritace,
Ave, pollens castitate,

Columna immobilis.

2. Ave, sponsa salvatoris,
Ave, puteus pudoris

Magnus altitudine,
Ave, splendens margarita,
Ave, pia, redimita

Mira pulchritudine.

3. Ave, martyr Christi grata,
Ave, summi Dei nata,

Regale palatium,
Ave, virgo Deo grata,
Ave, Christi advocata,
Ora patrem omnium.

4. Cum sis virgo laude digna,
Pia martyr et benigna,

Os meum non sufficit
[Tuas laudes] enarrare
Nec dolores explicare,

Quos tibi tortor intulit.

5. Tamen memor dulci prece,
Quam tu in instanti nece
Feceras ad Dominum,
Ut, qui tuae passionis
Memor esset et doloris,
Sentiret auxilium;

6. Hinc ego te defleo
Suspensam in eculeo,

Percussam virgis acriter,
A quo caesam deponentes
Carceri te recludentes,

Ibi visibiliter

7. Hostis nequam apparebat,
Devorare te volebat,

Sed crucis auxilio
Suas minas evasisti,
Cuius caput contrivisti

Dante Dei filio.

8. Carceri demum emissa,
Vasi aquae es immissa

Colligatis manibus,
In quo Deus te servavit
Et illaesam praesentavit

Tuis tribunalibus.

9. Sed praefecto hoc vidente
Visus est stridere [dente]

In te claram genere,
Decollari te praecepit,
Animam tuam suscepit

Angelus in aethere.

10. Quare tuum venerandum
Nomen atque adorandum

Rogito summopere,
Quatenus me, virgo pura,
Liberes ab omni cura
Et a cuncto scelere.

11. Ac in mea mortis hora
Assis mihi sine mora

Nec me sinas laedere
Potestates damnatorum,
Sed in locum beatorum

Me colloca propere.