153. De sancta Margareta.

1. O Margarita splendida,
Quae castitatis gratia
Pertulisti immania
In corpore supplicia.

2. Audi preces cum lacrimis,
Terge sordes libidinis,
Tuis me mundans meritis
Cunctis ab immunditiis.

3. O decus Antiochiae,
Paganorum progenie
Ortus de spinis roseus
Flos, prae cunctis pulcherrimus.

4. Te ad incestum flectere
Verbis nequit nec verbere,
Dum carnem cruciatibus
Dilacerat Olybrius.

5. Te orante in carcere
Draconis in effigie
Auctor adit libidinis
Tuis se monstrans meritis.

6. Ungularum et omnia
Poenarum vincis genera
Mox extinctis lampadibus
Per rorem sancti spiritus.

7. Aquae poenalis dolium
Baptismi facis lavacrum
Fusa prece ad Dominum,
Qui solamen est tristium.

8. Terra tremuit subito
Tuo stupens martyrio,
Columba caput caelica
Corona cingit aurea.

9. Paganorum plebs maxima
Dei cernens magnalia
Vana sprevit idola
Et credunt quinque milia.

10. Stans in mortis articulo
Preces fundens altissimo,
Ut tuae mortis memores
Vitae fiant participes,

11. Exaudita a Domino
Cervicem subdit gladio,
Sed consummans martyrium
Percussor reddit spiritum.

12. Membra ruunt virginea,
Felix recedit anima,
Velut columba candida
Regna petens caelestia.

13. O virgo memorabilis,
Sis mihi exorabilis,
Omne malum removens,
Bona cuncta tribuens.

14. O viva Christi hostia,
Margareta sanctissima,
Tua sit mihi passio
Peccatorum remissio.

15. Tua meae dilectio
Sit animae refectio
Iugis commemoratio
Sit mentis reparatio.

16. O virgo, sole pulchrior
Et omni melle dulcior,
Fac, ut tua memoria
Sit mihi perpes gloria.

17. Quae perpetravi scelera
Et mala, sunt innumera,
Ab eorum me sarcina
Tua prece exonera,

18. Ut post hoc triste saeculum
Insertus choro virginum
Per tua sancta merita
Vita fruar perpetua.