154. De sancta Margareta.

1. Theodosii filia,

Virgo fragrans ut lilia,

Beata Margareta,
Sana sumens consilia,
Christi servans eloquia,

Spiramine repleta.

2. Gentilium de semine
Hanc inflammante flamine

Puella baptizatur,
Quae vincit cum certamine
Olybrium, iuvamine

Christi fide firmatur.

3. Haec nutrici serviebat
Oves suas et pascebat

Virgo cum virginibus,
Quam formosam ut videbat,
In amorem mox ardebat

Infelix Olybrius.

4. Ad praefectum accersitur
Et de fide convenitur

Haec fide galeata,
Sed non cedit blandimentis
Emollitur aut tormentis
Christi cruce signata.

5. Virgo sudat in agone
Spe mercedis et coronae

Ad mortem oboediens,
Morte Christum imitata,
Fide firma roborata,

Firmo gressu gradiens.

6. Puella comprehenditur,
In carcere recluditur

Non devicta precibus,
Flagitiis consumitur,
Virago cuncta patitur

Non cedens tortoribus.

7. Suppliciis conteritur,
Diris poenis affligitur

Columba nobilis,
Sed stabilis efficitur
Et angelo reficitur
Turris in vinculis.

8. De carcere extrahitur,
De novo crucifigitur,

Ut aqua de rivulis,
Caeditur et recaeditur,
Eculeo suspenditur,

Manat rivus sanguinis.

9. O inaudita scelera,
Saeva poena mortifera,

Iudex detestabilis
Comburi iussit latera
Sanctae puellae tenera,

Serpens perterribilis.

10. O quam tristis, dolorosa
Stabat plebs et lacrimosa

Virgini compatiens,
Non devicta, gaudiosa
Stabat virgo virtuosa

Tot tormenta sustinens.

11. O res mira, quae est ista
Pugnans vincens agonista,

Pugillans viriliter?
Magni regis est legista
Stans pro fide decretista

Allegans subtiliter.

12. Haec draconem superavit
Saevum hostem et prostravit

Trusa in ergastulo,
Daemon victus ululavit,
Pede dextro quem calcavit

Crucis cum signaculo.

13. Tunc ense quinque milia
Cadunt, sed per auxilia

Liliosae virginis
Laeti fulgent cum gloria
In paradisi curia

Fonte loti sanguinis.

14. Haec de novo praesentatur
Ad tyrannum, quam hortatur

Adorare idola,
Sed reluctans spoliatur,
Saevis poenis cruciatur

Invicta christicola.

15. Denudatur, flagellatur,
Dulce corpus verberatur

Virgis, scorpionibus,
Ad os caro concrematur,
Trucidatur, laniatur

Ferreis pectinibus.

16. Post in vase collocatur
Aqua pleno et ligatur,

Sed terra concutitur,
Et tyrannus superatur,
Virgo Christi confortatur,
Illaesa egreditur.

17. Virgo Christi collaetatur,
Quod tyrannus expugnatur,

Gaudet victoriosa,
Ad certamen animatur
Et vincendo gratulatur

Puella gratiosa.

18. Sicut aurum repurgatur
In fornace, sic probatur

Haec virgo gloriosa,
Multis poenis haec vexatur,
Nunquam tamen violatur
Certatrix generosa.

19. Pharaonis induratur
Cor ferocis, inflammatur

Furoris incendio,
Et lictorem exhortatur,
Ut puella moriatur
Peracuto gladio.

20. A lictore postulatur
Et pro suis deprecatur

Haec orandi spatium,
Mox de caelis revelatur:
Quod petisti, impetratur.

Vadit ad supplicium.

21. Furor ingens debacchatur,
Ense caput amputatur

Gloriosae virginis,
Paradiso collocatur
Et pro nobis deprecatur
Regem summi numinis.

22. Virgo martyr, tuam genti
Passionem recolenti

Desuper irradia,
Impetrata da petenti,
Partum laetum parienti

Dona prece praevia.

23. Qui pendes ab ubere
Virginis puerperae,

Margaretae precibus
Miseris compatere,
Fac nos tecum vivere,

Iesu, in caelestibus.