157. De s. Maria Magdalena.

Salve, dulcis Magdalena,
Praenobilis et serena,
Quae amore Iesu Christi
Peccati sordes horruisti,
5. Devota rigans lacrima
Ipsius sancta vestigia

In Pharisaei convivio,
Dolore repleta nimio.
Ob hoc meruisti audire
10. Verbum pietatis mirae:
Dimissa tibi sunt peccata.
Exhinc tota inflammata

Nunquam redis ad peccata,
Sed virtute cummulata

15. Manes semper copulata
Christo tuo Domino
Tam in vita quam in morte.
In sanctarum mulierum sorte
Salvatoris passioni

20. Toti eius et agoni
Interesse meruisti
Et dilectum aspexisti
Virgis caedi, palmis trudi,
Probris, sputis et illudi,

25. Cum iniquis deputari
Atque spinis coronari,
Cruci tandem conclavari
Atque morte confirmari.
Unde vehementer saevit

30. Dolor atque planctus crevit,
Luctu crucis occupari
Da cor meum salutari
Una matre cum beata,
Nati morte sauciata.

35. O Magdalena inclita,
Dehinc mane tu venisti,
Salutare corpus Christi
Ut unguentis perlustrares
Tumbae maerens et astares.

40. Saevae mortis tunc victorem
Verae vitae et auctorem
Prae cunctis prima aspexisti,
Vitam pandens turbae tristi
Mane prima sabbathi.

45. Post hoc caelos ascendentem
Patrisque dexteram petentem
Regem immortalitatis
Cernis oculis beatis.
Angelorum cum regina,

50. Multa turba cum divina
Redis in cenaculum

Expectans miraculum
Doni sancti spiritus,
Quem misit pater et filius

55. In unionem congregatis.
Mens devota tua tota
Dum caret praesentia,
Cuius beneficia
Cum recolebas sedule,

60. Tempus ducebas flebile
Et suspirans post dilectum
Mundum spernis et supernis
Frueris decentius.
Carnem annis tu ter denis

65. Fame, siti atque poenis
Dum adfligis incessanter,
Per contiones tunc laetanter
Septenis boris elevans,
Pura mente satiaris

70. Visione deifica. .

Post hoc caelum dum ascendis
Et ad terram sanctam scandis,
Psallit chorus angelorum,
Gaudet turba beatorum,

75. A dilecto salutaris,
Sibi quoque copulans
Per amplexum caritatis
Sociarisque beatis
Angelorum coetibus.

80. O beata Magdalena,
Dulcis, mitis et amoena,
Mei memor esto, pia,
Dum consisto in hac via
Vitae huius periturae,

85. Et caelestis ac futurae
Vitae donum degustare
Tecum fac et corregnare
Per cuncta aevi saecula,
O beata Dei famula.