158. De sancta Maria Magdalena.

O piissima peccatrix,
Pedum Domini lavatrix,
Non de fontibus aquarum,
Sed de guttis lacrimarum,

Ut te multis a peccatis
Fons lavaret pietatis.
O praeclarum Deo templum,
Paenitentium exemplum,

Quae beatos pedes Christi
10. Sacris crinibus tersisti,
Ut meretricalis usus
A te fieret exclusus
Tergeretque tuas sordes
Manus per misericordes.
15. O solamen peccatorum,
Certa spes erroneorum,
Quae unguentum pretiosum
Super regem gloriosum
In tugurio leprosi,
20. Lepra mente scabiosi,
Sacris manibus fudisti,
Neminem erubuisti,
Ut foetori tuae mentis
Bonus odor recumbentis,

25. Spirantis per unctionem
Faceret abiectionem.
Audi me non exprobrantem,
Sed te magis exorantem,
Per eundem verum Deum

30. Fac mollescere cor meum,
Fac, ut saxum meae mentis
Fletus adfluat fluentis,
Ut per lacrimationem
Habeam remissionem

35. Atque bonum per odorem
Perdam criminum foetorem,
Ut purgatus a peccatis
Iungi merear beatis
In sacro regno polorum

40. Per saecula saeculorum.