159. De s. Maria Magdalena.

1. O dilectrix Iesu Christi,
Magdalena, quae flevisti
Culpas tuas et lavisti

Pia pedes Domini;
Maculas erubescebas,
Quia Deum offendebas,
Dum te ream cognoscebas,

Te prosternens homini.

2. Amans multum foris ploras,
Corde Christum intus oras
Et pedes eius irroras

Lacrimis uberrime;
Regis caput, pedes ungis,
Te ipsam corde compungis,
Christi gratiam emungis

Puniens asperrime.

3. Inspector mox oculorum
Miseratus est tuorum
Fletuum et peccatorum

Dedit indulgentiam ;
Audis: tibi remittuntur
Peccata nec ulciscuntur,
Sed dimissa conteguntur

Per Dei clementiam.

4. Manes sancta pace vadens,
Nunquam mortaliter cadens,
Bona docens, iusta suadens

Toto vitae tempore;
A daemoniis mundatam
Te laetaris et salvatam
Et gratiae reparatam
Anima et corpore.

5. Gaudens Christum imitaris,
Morte fratris conturbaris,
A Domino consolaris

Vivo fratre reddito.
Dei verbum audiendo,
Ad pedes Christi sedendo,
Summam partem eligendo

Felix es hoc addito.

6. Ad crucem Domini stabas,
Cum matre Christi plorabas,
Sepulcro te sociabas

Cunctis recedentibus ;
Luges iuxta monumentum,
Fers, quod emeras, unguentum,
Ploras corpus non inventum

Cum feminis flentibus.

7. Nuntiabas surrexisse

Christum fratribus, misisse
Gallilaeam, te vidisse

Redemptorem hominum,
Ascendentem conspexisti
Ultra mare transivisti,
Gentes multas convertisti,

Speluncam ingrederis.

8. Ibi diu paenitebas,
Asperam vitam agebas,
Humano cibo carebas,

Fame tunc non laederis.
Omni die septem horis
Es ab angelorum choris
De spelunca vecta foris,
Sic refecta crederis.

9. Hinc salvator te vocavit
De mundo, quam hic amavit,
Maximinus ministravit

Sacramenta gratiae;
Anima tua caelorum
Regna petit, beatorum
Regem vides angelorum

Laeta clara facie.

10. Nos doce peccata fiere,
Commissa semper dolere,
Committenda praecavere

Delicti piacula ;
Nobis fletuum da rivum,
Culpae malum ne per clivum
Nobis paret recidivum,
Solve retiacula.

11. Esto nobis advocata,
Speculum veniae data,
Omnis nostra sit laxata

Poena culpae scoria;
Sacram per orationem
Tuam Dei visionem
Habeamus tentionem

Felices in gloria.