162. De s. Maria Magdalena.

1. Felix, quae caeli solio
Regnas cum Dei filio,

Sponsa Christi beata,
Ad te, mater, confugio,
Me suscipe, refugio

Excelso sublimata.

2. O Magdalena domina,
Mea sume precamina,

Matrona pietatis,
Per te, beata femina,
Tergantur mea crimina,
Lucerna sanctitatis.

3. Manum indigno porrige,
Me peccatorem erige,

Summi regis filia,
Actus et vitam corrige,
Me redemptori dirige

Fragrans velut lilia.

4. A tormentis crucis poenae
Me conserva Magdalenae,

Iesu, sanctis precibus,
Me sub tua manu tene,
Ne involvant me catenae

Hostis cruciatibus.

5. O benigna, laude digna,
Magdalena, lux serena,

Mortuum vivifica,
Per amorem Iesu Christi,
Cuius pedes tu lavisti,

Me sibi iustifica.

6. Lux solaris, o Maria,
Stella maris, mater pia,

Misero compatere,
Caeli throno subiiciaris,
Quae cum Christo gloriaris,

Noli me deserere.

7. Iuva, mater, me dolentem
Pro commissis et petentem

Summi patris gratiam,
Ut me solvat a peccatis
Fons totius bonitatis

Et mihi det gloriam.

8. Mater sancta, gemma cara,
Ne me trahat mors amara,

Pium fer auxilium,
Immolatum crucis ara,
Ut me ponat luce clara,

Ora, post exsilium.

9. Mater, ora et implora,
Quem extrema mortis hora

Crucis in patibulo
Verberatum, vulneratum,
Flagellatum, cruciatum

Sic pro suo populo
Et videbas et dolebas,
Et lugebas et gemebas

Astans vultu quaerulo.

10. Ora reginam virginum,

Quae nulli claudit hominum

Gremium pietatis,
Ut interpellet filium,
Qui salus est humilium,

Ne damner pro peccatis.
11. Per te cives angelici
Cum ierarchia triplici

Orent unigenitum,
Simul sanctorum cunei
Et conventus virginei,

Ut me salvet perditum.

12. Per te caeli militia
Mihi fiat propitia,

Maria Magdalena,
Qui tot commisi vitia,
Me, Dei plena gratia,

Iuva prece serena.

13. Qui de Maria virgine

Carnem pro nostro crimine,

Rex omnium creator,
Dignatus es assumere,
Mala velis dissolvere,

Supernae vitae dator.

14. Mundi salvator Domine,
Qui pretioso sanguine

De caelo descendisti
Peccatores redimere,
Digneris mihi parcere,

Qui mortem pertulisti.

15. Per illa salutifera,

Quae te portarunt, viscera,

Precor, fili virginis,
Et per materna ubera,
Quae suxisti fructifera,

Laxa pondus criminis.

16. Iesu, misericordiae

Fons et largitor gratiae,
Rex summae bonitatis,
Per Magdalenae merita
Mea dimitte debita,
Qui regna das beatis.