163. De s. Maria Magdalena.

1. Ave, dulcis Magdalena,
Peccatorum spes amoena,

Lumen paenitentium ;
Ave, salutaris vena,
Rore caeli vere plena,

Rigans vitam gentium.

2. Ave, hospes gratiosa,
Quam elegit generosa

Proles cum discipulis;
Ave, victrix gloriosa
Summi regis ac famosa

Memoranda saeculis.

3. Ave, testis crucis Christi,
Iesum cernens mente tristi

Mortis pati taedia;
Ave, digna quae fuisti
Prima resurgentis Christi
Mundo ferre gaudia.

4. Ave, digne veneranda,
Quam laudavit adoranda

Dei sapientia;
Ave, cunctis admiranda,
Quae ter denis annis blanda

Hausisti caelestia.

5. Ave, dulcis melodia,
Iuncta sponso propter pia

Amoris obsequia,
Memor esto mente pia
Nunc tuorum, o Maria,

Plena caeli gratia.