ARTICULUS I. Quid sint Archangeli

?''

Ad primum proceditur sic :

Dicit Gregorius, " Qui summa annuntiant, Archangeli vocantur ." Et reddit rationem dicens : Graeca enim lingua Angeli nuntii, Archangeli summi nuntii vocantur. "

Videtur autem, quod penes hoc non distinguatur aliquis specialis ordo.

1. Summa enim nuntiare et non summa, non sunt actus differentes specie. Ergo illi actus non sunt officia differentia specie : ergo neque ordines.

2. Item, Hoc accipitur ex verbo Gregorii quod dicitur infra : " Sunt nonnulli qui divinae largitatis munere refecti, secretorum coelestium summa et capere praevalent et nuntiare. Quo ergo illi nisi inter Archangelorum numerum deputantur ? " Ex hoc patet, quod in huma. na hierarchia Archangelorum actus non constituit in aliquo officio speciali : ergo videtur, quod neque in angelica.

3. Item, Bernardus in libro V de Consideratione ad Eugenium : " Putemus esse Archangelos qui conscii ministeriorum divinorum, non nisi ob praecipuas et maximas causas mittuntur. " Sed illi de prima hierarchia magis sunt conscii ministeriorum. Ergo magis sunt Archangeli.

Et si forte dicatur, quod ab actu missionis dicuntur Archangeli. Hoc patet non esse verum : quia mitti convenit multis de media et postrema hierarchia. Unde penes mitti non est ordo specialis. Cum ergo in determinatione Archangelorum non ponantur nisi illa duo, penes conscientiam secretorum erit determinatio Archangelorum : et sic sequitur primum inconveniens. Et hoc expresse dicit Bernardus in sermone 19 super Cantica : " Porro Archangelos (ut eis aliquid differentius ab his qui simpliciter Angeli sunt, tribuamus) mirabiliter credo delectat, quod et ipsis quoque aeternae sapientiae consiliis familiarius admittuntur, eademque per ipsos suis quaeque locis

atque temporibus summo moderamine dispensantur. "

Solutio, Dicendum, quod Archangelorum officium est accipere illuminationes ad revelationem eorum quae sunt supra naturam, sicut incarnatio Filii, et conceptus sterilis, et hujusmodi : et illa dicuntur summa, a beato Gregorio. Angelorum autem officium infra determinabitur.

Ad id quod objicitur, dicendum quod partes potestativae distinguuntur penes inferiores et altiores actus, ut prius dictum est : et ideo cum nuntiare talia quae summa sunt, addat aliquid super nuntiare talia quae pertinent ad communem custodiam animarum, erit speciale officium Archangelorum distinctum ab officio Angelorum.

Ad ALIUD dicendum, quod conscientia secretorum magis convenit superioribus quam inferioribus : sed tamen ab illis non denominantur : quia hoc non est ultimum eorum secundum sua officia, ut supra dictum est.