184. De ss. Petro et Paulo.

Petre, Paule, congaudete,
Servo vestro confavete.
Principes excelsi terrae,
O si possem nunc proferre
5. Vobis laudes deauratas,
Hoc optarem, opes gratas,
Nam vos principales estis,
Ut est Christus ipse testis.
Vos praelati praelatorum,
10. Principes apostolorum,
Vos columnae columnarum,
Lumina ecclesiarum,
Quarum primi plantatores,
Summi duces et rectores.

15. Vos estis et patres patrum,
Veri dilectores fratrum,
Clari caeli sine nube
Et doctorum altae tubae,
Fontes christianae legis

20. Et pastores Christi gregis.
Unus vas electionis,
Alter fons dilectionis,
Unus magnus praedicator,
Alter caeli reserator.

25. Quid virtutis, quid honoris,
Spei, fidei, amoris,
Quidquid decet paenitentem
Vel in bonis procedentem

Aut in cunctis iam perfectum,
30. Vos praebetis iter rectum.
O patroni, vobis credo,
Ad vos spero, vobis me do,
Mala cuncta effugate,

Dona cuncta procurate,
35. Sic ut mihi sint in morte
Mox apertae caeli portae.
Pater, natus, sacrum flamen,
Unus Deus det hoc. Amen.