185. De 88. Petro et Paulo.

1. Petre, gregis Christi pastor,
Carnis legis, qua infestor,

Sis destructor precibus,
Praedicator Paule gentis,
Elevator sis iacentis

In peccati faecibus.

2. Eia, Petre, tuis donis
Nunquam taetrae visionis

Me terror exterreat,
Ac ut iungar lucis aulae,
Fac, compungar, sancte Paule,
Sic, ut hostis corruat.

3. Tu dignare, Petre, mentem
Mihi dare nunc deflentem

Sordes cunctas vitii;
Vas electum, per lamenta
Fac me rectum, ut tormenta

Evadam suplicii.

4. Rogo, precem pro me funde,
Petre, necem qua confunde

Qua et me custodias,
Largitatem, Paule, patris,
Pietatem Christi matris

Me sentire facias.

5. Vasta spinam peccatorum
Et reginam, Petre, morum

Mihi fac propitiam,
Veritatis doctor bone,
Dictae satis in agone
Fac iuvamen sentiam.

6. Sic moderna fac percurram,
Ut aeterna non incurram,

Petre, loca flentium,
Sed largire finem sanctum,
Tollens dirae mortis planctum,
Paule, doctor gentium.