193. De sancto Servatio.

1. O praesul mitissime,
Sanctus et benignus,
Servati sanctissime,
Omni laude dignus.

2. Gloria tua redolet
In orbe terrarum,
Mundus iustum te concrepet
Omnium causarum.
3. Tuam doctrinam inclitam
Illaesam servasti
Absque ruga et macula
Sponsamque amasti.

4. Dona nempe, a Domino
Quae tibi collata,
Impertire tuo famulo,
Et sunt Deo grata.
5. Tibi fuerat tradita
Potestas ligandi,
Ut ablueres scelera
Clave absolvendi.

6. Nam balsamo iucundior
Vita tu flagrans,
Ad laborandum pronior,
Totum mundum sanans.

7. Precibus nunc flagito
Tuum consolamen,
Totis viribus rogito
Fortius iuvamen.
8. Cum in hoc mundo degimus
Ab hoste [non] securi,
Iudicio timebimus
Saeculi futuri.
9. Cum hostis accusaverit,
Nobis tunc assistas,
Quousque fugam dederit,
A nobis nec desistas.

10. Sed funde preces iugiter,
Ut tecum laudemus,
Corregnando perenniter
Domino assistemus.