ARTICULUS III. De modo custodiendi

.

Tertio, Quaeritur de modo custodiendi.

Et sumatur illud beati Bernardi ad Eugenium in libro V de Consideratione, ubi dicit sic : " Inest Angelus suggerens bonum, non bonum creans. "

Et videtur, quod

1. Angelus sit in nobis, et suggerat et hortetur ad bonum.

2. Praeterea, Hoc videtur falsum quod dicit, quod non est bonum ingerens, cum supra habitum sit, quod Angeli ingerunt illuminationes suas hominibus.

3. Praeterea, Dicit beatus Bernardus ibidem, quod Angelus est cum anima, Deus in anima : ille ut contubernalis animae inest, Deus ut vita. Ergo videtur, quod Angeli possint esse in corpore, licet non in anima. Et si hoc concedatur, tunc quaeritur, Per quem modum sit in corpore ?

4. Praeterea, Videtur quod non sit in corpore : quia dicit beatus Bernardus in sermone 7 super Cantica : " Credimus Angelos adstare orantibus, et offerre Deo preces et vota hominum, ubi tamen sine ira et disceptatione levari puras manus perspexerint. " Ergo videtur, quod adstent et non insint.

5. Praeterea, Videtur quod visitando et colligendo in palatio custodiant : quia dicitur in eodem sermone infra : " Non ambigo, quin gratanter in palatio colligant quem dignanter in sterquilinio visitant. " Ergo visitando et colligendo post mortem videntur custodire. .

6. Quod autem modus custodiendi sit ex defensione a nocivis, videtur haberi a

Psalmista, ubi dicit : Angelis suis mandavit de te, ut custodiant te in omnibus viis tuis. In manibus portabunt te, ne forte offendas ad lapidem pedem tuum, etc. .

Solutio. Dicimus, quod modus custodiendi est in suggerendo et hortando, sicut dicit beatus Bernardus. Suggerunt autem et hortantur per illuminationes quas ingerunt animabus, ut supra diximus.

Quod autem quaeritur, Utrum sint in corpore, vel extra adstent hominibus ? Dicendum, quod utrumque possibile est.

Et si quaeritur, Per quem modum sunt intus ? Dicimus, quod ut operantes super vires animae : possunt enim commovere corpora, et imprimere species, ut supra diximus.

Ad hoc autem quod objicitur de visitatione et collectione, dicendum quod visitatio generalis modus est custodire : quia est post vitam istam: sed proprius est obsequium, quod ex affectu praestant Angeli ei qui suggestioni et exhortationi Angeli custodientis dum viveret, bene obtemperavit.

Ad hoc autem quod objicitur de Psalmo, dicendum, quod in manibus portare, est in defensione Angeli permanere, ne per offendiculum, id est, per scandalum imitationis offendant ad lapides, id est, ad duros et frigidos peccatores.