198. De B. Stanislao Casimiritano.

1. Contemplator trinitatis,
Recens rosa castitatis,

Flos oboedientiae,
Stanislae, lacrimanti
Assis et te imploranti,

Iubar sanctimoniae.
2. Funde preces, flecte Deum,
Ut illustret pectus meum,

Ad te mentem erigo,
Ut sim salvus tuo dono,
Meam in te spem repono,

Te patronum eligo.
8. Verbi Dei praedicator,
Fervens virtutum amator,

Gemma pudicitiae,
Vagos stringe cogitatus,
Per te in me firmus status

Regnet continentiae.

4. Sensus firma fluctuantes,
Hostes fuga conturbantes,

Comprime daemonia,
Firma mentem, iram frena,
Confer pacem, cor serena,
Aufer adversantia.

5. Praeelecte, tu dignare
Peccatori impetrare

Mihi Cbristi veniam,
Ut sic possim respirare
Et excessus emendare

Consecutus gratiam.

6. Confer vitae sanctitatem
Corporisque sanitatem,

Da quieta tempora,
Auge meram caritatem,
Cordis tolle pravitatem,

Me languentem robora.
7. O lucerna, flos virtutum,
Nobis praebens iter tutum,

Stella lucens saeculo,
Iubar tuae claritatis
Me defendat a peccatis,

Tollat ab ergastulo.
8. Vitae meae rege cursum
Ac post mortem trahe sursum,

Confer caeli gaudia,
Ubi Deum contemplari
Iustisque associari

Merear in gloria.