200. De sancto Stephano.

1. Stephanus Israelita,
Legis ordine levita,
Fide praestans, probus vita,

Plenus septem munerum,
Timens Deum, servus bonus,
Dulce Christi ferens onus,
Ab ecclesia patronus

Est electus pauperum,
Expers labe vitiorum
Ob prodigia signorum
Praedicans discipulorum

Augmentavit numerum.

2. Pollens actu, verbo clarus,
Lucens mundo, Deo carus,
Legis Dei non ignarus,

Constans in iustitia,
Huic dono singulari
Protomartyr appellari
Datum est et contemplari

Dominum in gloria.
Ad tormentum iudicatus,
Poenis magnis lapidatus,
Christum sequens est precatus

Pro lictorum venia.

3. Novum psallere concentum
Caeli credimus conventum
Propter martyris adventum,

Purpurati sanguine,
Ubi cum sanctorum coetu
Semper gaudet absque fletu
Fruiturque sine metu

Vultus Dei lumine.
Sancte signifer regalis,
Mortis victor triumphalis
Supplica pro nobis malis

In extremo turbine.