203. Mira consonantia sanctorum Thomae apostoli et Thomae

archiepiscopi et martyris.

1. Duae stellae claritatis

Verum solem aequitatis

Ambiunt in medio,

Thomas Thomasque sunt stellae,

Sol est virginalis cellae

Proles in praesaepio.

2. Centrum, cum quo laterantur,

Pari tomo contemplantur

Hinc inde dispositi,

Sed hi caelis orientes

Ortum Christi sunt cingentes

In terrenis positi,

3. Militum, qui stipant regem,

Festa servant, cum his legem

Eundem per ordinem,

Primum dedit rex priori,

Postremum posteriori

Iuxta rectitudinem.

4. Lustratores dies bini

Utrique diei quini

Signant praeminentiam,

Hi natales, hic natalis,

Licet aliter sit talis

Causam habens aliam.

5. Sicut temporum nascendi,

Sic locorum patiendi

Consonat distantia,

Ut a multis est assertum

Et videtur scripto certum

Quadam cum historia.

6. Prior Thomas ad aurorae

Limen sitam Indiam,

Alter purpurat cruore

Sub occasu Angliam.

7. Qui, quod crucifixi dico

Propter agni victimam,

In telluris umbilico

Vallant Ierosolimam.

8. Thomas est apostolus

Et patronus caelicus,

Thomas est filiolus

Et vir apostolicus.

9. Hic primorum legatorum

Unus est in serie,

Hic legatus et primatus

Culmen tenens Angliae.

10. Ambo patres est pastores

Oleique filii,

Primus reserat canores

Clausos nece socii.

11. Cantica, quae cessavere

Flente Cantuaria,

Primi contigit patere

Post ad natalitia.

12. Ferro primus perforatur,

Et secundus trucidatur

Ferri saevis ictibus,

Hic in paganorum fano,

Hic in metropolitano

Templo sacro cultibus.

13. Sic natalem salvatoris

Thomae saepit iunioris

Senisque nativitas,

In prioris festo natum,

Nono die coronatum

Reddit immortalitas.

14. Ergo simus mente sursum,

Ut post vitae nostrae cursum

Nobis meta posita

Nos cum coetu angelorum

Christus iungat per amborum

Preces atque merita.