212. Alphabetum de malis Sacerdotibus.

1. Aquarum meis quis det fontem oculis
Ad deplorandam pastorum amariter
Reprobam vitam non tenentem tramitem
Mente supernum?

2. Bonus, pro suis qui det vitam ovibus,
Vix reperitur pastor his temporibus,
At mercenariis abundant ovilium
Saepta sacrorum.

3. Curis mundanis pastores inserviunt
Lucrisque cuncti inhiant fugacibus,
Idcirco lupi patet grex dominicus
Morsibus atris.

4c. Divinae legis abdita mysteria

Plebibus Christi non est qui aperiat,
Nec est ieiunis mentibus qui praebeat
Pabula verbi.

5. En, adimpletur, quod sagaci spiritu
Propheta dixit: erit sicut populus
Sic et sacerdos tempore novissimo
Cordis egeni.

6. Factum videmus.quod divina sonuit
Vox, vitae nostrae sal infatuatum est,
Quod ne iam foras mittatur timendum est,
Ad nihil aptum.

7. Gratis accepta munerum charismata
Gratis non dantur, expetuntur praemia,
Ne qua sit ictus timetur sententia
Simon iniquus.

8. Honores sacros adipisci cupiunt,
Non ut doctrinis erudiant subditos,
Sed ut stipentur, verbis obsequentium
Plus venerentur.

9. Iuvamen ferre oppressis cum debeant
Et recreare tribulantum viscera,
Hos inde premunt, illos magis sauciant
Flumine verbi.

10. Karitas vera, quod est donum optimum,
Non est in illis, despiciunt subditos,
Pauperes spernunt, peregrinos respuunt
Mente tumenti.

11. Lychnos ardentes, ut praecepit Dominus,
Manu non gestant, ut accendant proximos,
Nec dare laxis curant, heu, pro dolor,
Cingula lumbis.

12. Mundi repleta iugera sunt messibus,
Messores desunt metendi segetibus,
Mitte per fruges tuos operarios,
Christe, precamur.

13. Non est medelam qui praebeat languidis
Quique elisos et confractos elevet,
Nisi nos rector corrigas iustissime,
Nempe perimus.

14. Omnes, quod suum est, pastores quaesitant,
Neglegunt curam gregis et custodiam,
Ideo morbi vis saeva et lurida
Serpit in omnes.

15. Pastorum pastor cito iam adveniet;
Quid vos pastores facietis, dicite,
Commisi gregis qui curam neglegitis
Vana sequentes?

16. Qui terrae datum absondit in scrobibus
Talentum, diris mancipatur ignibus,
Cur non timetur, ne parva sit illius
Poena, sequaces?

17. Resistit nullus oppressori pauperum,
Canes sunt muti, elatrare nesciunt
Nunc sacerdotes, ut librorum veterum
Dicta loquuntur.

18. Si quando forte de scripturis aliquid
Vel vile narrant, vanae laude gloriae
Ut extollantur, non ut prosint animae,
Mente volutant.

19. Terra suetis infecunda frugibus

Hic non ornatur, non est modus aerum,
Diversis mundus hinc malis opprimitur
Iam ruiturus.

20. Vineam patris, o proles altissimi,
Iam bone pastor miseratus respice,
Sana contritos et iacentes erige,
Ne pereamus.

21. eXtolle nomen sacerdotum infimis,
Quod volutatur terra sub negotiis,
Et fac, ut tibi famulentur iugiter,
Rector Olympi.

22. Ymnos psalmosque, da, ut tibi concinant,
Tramitem rectum, concede, ut teneant
Nec iam incedant amplius per invia
Perditionis.

23. Zelo benigno, tribue, ut ardeant
Curamque sui ovilis ut habeant
Et tecum sancta possidere valeant
Gaudia regni.