ARTICULUS II.

Utrum omni motu suo peccet malus Angelus?

Secundo quaeritur, An omni motu suo peccet malus Angelus ? Et videtur, quod. sic.

1. Dicitur in Glossa super epistolam I ad Corinthios, I, 10, quod diabolus omnia male agit : ergo videtur, quod omni motu suo peccet.

2. Item, Dicit Augustinus, quod " tota vita infidelium peccatum est : " sed diabolus pejorest infidelibus : ergo etiam tota vita ejus peccatum est, et multo magis.

3. Item, Videtur hoc sonare nomen confirmationis in malo : quod enim confirmatum est in aliquo, indeclinabile est ab illo : sed diabolus confirmatus est in malo : ergo inflexibilis est, a malo, et ita non facit nisi malum : ergo omni actu suo peccat.

4. Item, Per oppositum se habent vita boni Angeli et vita mali : sed. vita boni Angeli tota refertur ad gloriam Dei : ergo vita mali Angeli tota est contraria gloriae Dei,et ita tota erit peccatum.

Solutio. Motus diaboli duplices sunt secundum duplices potentias a quibus egrediuntur : sunt enim in ipso potentiae naturales, de quibus dicit Dionysius ,''

quod data illis naturalia bona nequaquam esse mutata dicimus. Et sunt potentiae deliberativae in ipso et rationales. Motus igitur qui egrediuntur a potentiis deliberativis et rationalibus, omnes mali sunt. Sed qui egrediuntur a potentiis naturalibus, dupliciter possunt considerari, scilicet in se, et sic neque boni neque mali sunt bonitate virtutis vel malitia vitii : aut in quantum per intentionem deliberantem informantur, et sic mali sunt : quia etsi quandoque justi sunt in eo quod a potestate Dei ordinantur, quae semper justa est, ut dicit Gregorius, tamen propter intentionem malam, mali sunt: quia motus intelligentiae praecipue informantur ex fine intento et denominantur.

Ad primum autem dicendum, quod Glossa intelligitur quantum ad intentionem diaboli.

An secundum dicendum, quod auctoritas Augustini sic intelligitur, quod tota vita infidelium est peccatum, hoc est, in peccato est : quia nullum peccatum sive modicum sive grande remittitur eis, cum non habeant gratiam per quam omne peccatum remittitur. Non autem sic intelligitur, quod quolibet motu suo peccent.

Ad tertium dicendum, quod confirmatio non mutavit naturam, sed intentionem.

Ad ultimum dicendum, quod similiter per oppositum est in Angelo bono : motus enim quidam sunt in ipso a potentiis naturalibus, sicut vivere, intelligere, et hujusmodi, qui indifferentes sunt si in se considerentur : sed per intentionem ad gloriam Dei. referuntur.