238. De Accusatione hominis erga Deum,

1. Audi me, Deus piissime,
Impie vivendo peccavi

Nimis,
Mortem consecutus sum,
Oboediendo satanae

Captus sum.

2. Bone plasmator, audi me,
Longe factus sum a te,

Piissime,
Peccata mea ligant me,
Ut revertar ad te,

Adiuva me.

3. Coepi servire Domino,
Invidia diaboli

Vicit me,
Donum Dei habui,
Dies meos neglexi,
Heu mel

4. Deus invisibilis,

Qui sursum sedes, vide

Humilem,
Cor contritum, plango ad te,
Miserere super me,
Quia plasmasti me.

5. Exeant peccata,

Quae sunt in me confixa

Misero,
Abrenuntio diabolo
Et omnibus eius actibus
Adiuvante te.

6. Fiant mihi lacrimae
Panis die ac nocte

Cotidie,
Omnia mea crimina
Veniant in memoria

Ante te.

7. Gravia enim delicta
Gravia quaerunt lamenta,

Sic et in me,
Incesti quoque oculi
Fluunt mihi amariter

Undique.

8. Haec erat lamentatio
In alienis opibus

Et non in meis,
Aliena congregavi,
Caeli thesaurum perdidi,

Heu mel

9. Infra sancta regula
Nutritus fui dulciter,

Postmodum
Omnia mala perfeci,
Te solum non negavi
Omnipotens.

10. Kalumnia super calumnia,
Fui super omnia

Ego miser,
Si peccavi graviter,
Iam flebo amariter

Indulge me.

11. Lux desiderabilis,
Scio me longe a te,

Piissime,
Si avertis faciem.
Ubi peto veniam,

Nisi a te?

12. Mihi lamentatio

Plura fiat prae omnibus

Pro delictis meis.
De tuis quod perdidi,
In quo mihi recuperem,
Nisi per te?

13. Non mereor, ut mihi,
Parcas, nisi fuerit

Pietas tua.
Hoc precor, ut memineris,
Quod pretium me emisti,

Redemptor vitae.

14. O mira exspectatio
Et cordis lamentatio
Pro delictis meis,
Omnia mea crimina
Reduco in memoria
Coram te.

15. Peccavi cum peccantibus,
Nullus est, qui adiuvet

In planctibus,
Qui mihi sunt consimiles,
Planxi incessabiliter
Apud me.

16. Quare non fui mortuus,
Dum fui in sacris fontibus

Ego miser?
Vel cui sum consimilis
In tam malis criminibus

Ego miser?

17. Revertere ad me, Domine,
Ne pereamus invicem,

Succurre nobis,
Redemptor vitae maxime,
Quid sum dicturus ante te,

Domine.

18. Sancte et immortalis,
Indulge meis peccatis,

Altissime,
Omnia mea crimina
Reduco in memoria

Ante te.

19. Tibi refero gloriam,

Qui me exspectas per tempora

Domine,
Porrige auxilium,
Eripe me de exsilio,

Quo captus sum.

20. Uni Deo per omnia
Agimus paenitentiam

Vivendi,
Ut maior iracundia
Culpa inquirit gratiam,

Indulge me.

21. X Y et Z

Concludunt ista verba

Simplicia.
Omnes intente audite,
Paenitentiam agite

Et vivite.

22. Gloria Deo coaevo,

Cui honorem semper do,

Altissime,
Una cum Dei filio
Et cum sancto spiritu.

Amen.