255. Vado mori.

Vado mori, series ab initio nova non est,

Omne vivens noscat dicere: vado mori.
Vado mori, res certa quidem, nil certius illa,

Hora sed incerta vel mora, vado mori.
5. Vado mori, sed nescio, quo vel quomodo, quando,

Cum minus puto, tunc dico: vado mori.
Vado mori, videat, quo currat quisque superstes,

Cursor habet memori dicere: vado mori.
Vado mori, praesens transactis aequiparabor,
10. Sed non transivi, transeo, vado mori.

Vado mori, cinis in cinerem tandem rediturus,

Ordine quo coepi, desino ; vado mori.
Vado mori, sectans alios sectandus et ipse,

Ultimus ac primus non ero, vado mori.
15. Vado mori, rex sum, quid honor, quid gloria regni?

Est via mors hominis regia, vado mori.
Vado mori papas nam mors, praeparavi diu me,

Non sinit, os cogit claudere, vado mori.
Vado mori miles, belli certamine victor,
20. Mortem non didici vincere, vado mori.
Vado mori, pugiles doctus superare duello,

Sed mortem nequeo vincere, vado mori.
Vado mori iudex, quia iam plures reprehendi,

Iudicium mortis sentio, vado mori.
25. Vado mori consul prudens, prudentia mundi

Nulla potest mortem fallere, vado mori.
Vado mori civis, nec opes nec deliciae me

Securum reddent de nece, vado mori.
Vado mori, causas aliorum iuraque fovi.
30. In me iura fovet mors sua, vado mori.
Vado mori, ceteros mercator saepe fefelli,

Sed mortem nequeo fallere, vado mori.
Vado mori, genitus de sanguine nobiliori,

Nec genus indutias dat mihi, vado mori.

35. Vado mori pulcher visu, mors ipsa decori
Vel formae nescit parcere, vado mori.
Vado mori medicus, medicamine non redimendus.

Quidquid agat medici potio, vado mori.
Vado mori logicas, aliis concludere novi,
40. Concludet brevi mors mihi, vado mori.
Vado mori sapiens, sed quae sapientia novit

Astutias mortis fallere? vado mori.
Vado mori stultus, mors stulto vel sapienti
Non iungit pacis foedera, vado mori.
45. Vado mori dives, aurum vel copia rerum
Nullum respectum dant mihi, vado mori.
Vado mori pauper, nil mecum defero, mundo

Contempto nudus transeo, vado mori.
Vado mori monachus, mundi moriturus amori,
50. Hunc spernens possum dicere, vado mori.
Vado mori senior, nam finis temporis instat,

Iamque patet mortis ianua, vado mori.
Vado mori iuvenis, quia non valet ipsa iuventus
Ultra metam vitam ducere, vado mori.
55. Vado mori sperans per longum vivere tempus,
Forte dies haec est ultima, vado mori.
Vado mori gaudens, non gaudens tempore longo.

Mundi dimitto gaudia, vado mori.
Vado mori, non me retinet vitiosa voluptas,
60. Nec luxus auget vivere, vado mori.
Vado mori epulis variis vinoque repletus,

His utens restat dicere: vado mori.
Vado mori cernens, quod mors cunctis dominatur.
Tensa videns mortis retia vado mori.
65. Vado mori, non me tenet ornatus neque vestis
Linea nec mollis culcita, vado mori.
Vado mori, quotiens mortem considero certam,

Mortis opus meditor, desero, vado mori.
Vado mori, misero sententia dura, beato
70. Grata, mori sequitur vivere, vado mori.
Vado mori sperans vitam sine fine manentem,

Spernens praesentem, sic bene vado mori.
Vado mori, miserere mei, rex melite Christe,
Omnia dimittens debita, vado mori.
75. Vado mori, rex alme, viam vitae mibi monstra,
Ut vitare queam devia, vado mori.